[retour à un affichage normal]

Accueil > recherche > Affichage d'une occurrence en contexte

Mazarinade n° A_7_62

Image de la page

Anonyme [1649], TRAICTE DE PAIX ENTRE SA MAIESTÉ CATHOLIQVE, ET Les Srs Estats Generaux des Prouinces Vnies du Païs-bas. Iouxte la copie imprimée à Bruxelles. , français, espagnol, néerlandaisRéférence RIM : M0_3798. Cote locale : A_7_62.



AV Nom & à la gloire de Dieu, soit notoire à tous,
qu’apres le long tours des sanglantes guerres, qui ont
affligé par tant d’années les Peuples, Subjets, Royaumes
& Pays de l’obeïssance des Seigneurs Roy des Espagnes,
& Estats Generaux des Prouinces vnies du Pays Bas ;
Eux Seigneurs Roy & Estats touchez de compassion Chrestienne,
& desirans mettre fin aux calamitez publiques, & arrester les déplorables
suites, inconueniens, dommages & dangers, que la continuation
vlterieure desdites guerres des Pays-bas pourroit tirer
apres soy ; mesme par vne extension en autres Estats, Pays,
Terres & Mers plus reculées : Et afin d’en changer les sinistres effects,
en ceux tres-agreables d’vne bonne & sincere pacification de
part & d’autre, & aux doux fruits d’vn entier & ferme repos pour
le soulagement desdits Peuples & Estats de leur obeïssance, & pour
le restablissement des dommages passez, au bien commun, non seulement
des Pays-bas, mais de toute la Chrestienté ; cõuians & prians
les autres Princes & Potentats d’icelle de se laisser fléchir par la
grace diuine, à la mesme compassion, & auersion des malheurs, ruines,
& desordres, que ce pesant fleau de la guerre, a fait si longuement
& durement ressentir ; Pour paruenir à vne si bonne fin, & à
vn but tant desirable, ont iceux Seigneurs Roy des Espagnes DON
PHILIPPE IV. & Estats Generaux desdites Prouinces vnies du
pays-bas, commis & deputé, c’est à sçauoir ledit Seigneur Roy Don
Gaspar de Braccamonte, & de Gusman, Comte de Penaranda,
Seigneur de Aldea seca de la Frontera, Cheualier de l’ordre de
Alcantara, Administrateur perpetuel de la Commãderie de Daymiel,
de l’ordre de Calatrava, Gentilhomme de la Chambre de sa
Majesté, de son Conseil & Chambre, Ambassadeur extraordinaire
vers sa Maiesté Imperiale, & premier Plenipotentiaire pour
le traité de la paix generale ; Et Messire Antoine Brun, Cheualier
Conseiller de sa Maiesté Catholique en son Conseil d’Estat, & Supreme,
pour les affaires des Pays-bas & de Bourgongne, prés de sa
personne, & son Plenipotentiaire aux traictez de la paix generale.