[retour à un affichage normal]

Mazarinade n° D_1_4

Image de la page

Anonyme [1642 [?]], TESTAMENT DE MONSIEVR LE CARDINAL DVC DE RICHELIEV. , françaisRéférence RIM : Mx. Cote locale : D_1_4.

sa Bonté d’accepter à ma tres-humble & tres-instante suplication, que ie lui
fais encore par ce present testament d’ordonner que le contract soit executé
en tousses poincts.
 
Ie supplie tres-humblement sa Maiesté d’auoir agreable 8. tentures de tapisserie,
& 3. licts que ie prie Mad. la Duchesse d’Eguillon ma Niepce, & Monsieur
de Noyers de choisir entre mes meubles pour seruir à vne partie des
ameublement des principaux appartenans dudit Palais Cardinal.
Comme aussi ie la supplie d’agréer la donation que ie luy faicts en outre de
l’Hostel qui est deuant le Palais Cardinal, lequel i’ay acquis de feu Monsieur
le Commandeur de Sillery, pour au lieu d’iceluy faire vne place au deuant
dudit Palais Cardinal.
Ie supplie aussi tres-humblement sa Maiesté de trouuer bon que l’on luy
mette entre les mains la somme de quinze cens mil liures, dont i’ai fait mention
cy-dessus, de laquelle somme ie puis dire auec verité de m’estre seruy
tres-vtilement aux plus grandes affaires de son Estat, en sorte que si ie n’eusse
eu cet argent en ma disposition, quelques affaires qui ont bien succedé eussent
apparemment mal reussi, ce qui me donne suiet d’oser supplier sa Maiesté de
destiner ceste somme que ie luy laisse, pour employer en diuerses occasions,
qui ne peuuent souffrir la longueur des formes : de finance.
Et pour le surplus de tous & chacuns mes biens presens & à venir, de
quelque nature qu’ils soient, ie veux & ordonne qu’ils soient partagez &
diuisez ainsi qu’il s’ensuit.
Ie donne & legue à Armand de Maillé mon Neueu & fileul, fils d’Vrban
de Maillé Marquis de Brezé Mareschal de France, & de Nicole du Plessis
ma seconde sœur, & en ce ie l’institue mon heritier pour les droicts qu’il
pourroit pretendre en toutes les terres & autres qui se trouueront en ma succession
lors de mon decez, ce qui s’ensuit.
Premierement ie luy donne & legue mon Duché & Pairie de Fronsac
& Caumont, y ioint ensemble tout ce qui en depend, & qui sera ioint, & en
dependra lors qu’il plaira à Dieu disposer de moy.
Plus ie luy donne la terre & Marquizat de Grauille, ses appartenances
& dependances.
Item ie luy donne & legue le Comté de Beaufort en vallée.
Item, ie luy donne & legue la terre & Baronie de Tresne size au pays
d’Aniou, que i’ay acquise du Marquis de Lezé pardeuant Parque & Guerreau
Notaires au Chastelet de Paris.
Item, ie luy donne & legue la somme de trois cens mil liures qui est au
chasteau de Saumur, laquelle ie veux & ordonne estre employée en acquisition
de terres nobles, en tiltre du moins de Chastelenie ; pour iouyr par
mondit Neueu desdites terres aux conditions d’institutions & substitutions,
qui seront cy-apres apposees en ce mien testament.
Item, ie luy donne & legue la ferme des poids de Normandie, qui est presentement
affermée à 50. mil liures par an, ou enuiron.
Ie veux & entens que mondit Neueu Armand de Maillé laisse à mon
frere le Mareschal de Brezé son pero la iouyssance de ladite terre & Baronie
de Tresne sa vie durant.
Ie veux & entens que la descharge que i’ay cy deuant donnee audit sieur
Mareschal de Brezé par acte passé pardeuant Guerreau & Parque Notaires
le 30. Aoust 1632. & tout ce qu’il me pourra deuoir lors de mon decez, ait lieu,
& soit executé fidellement, ne voulant pas que mondit Nepueu Armande de