[retour à un affichage normal]

Accueil > recherche > Affichage d'une occurrence en contexte

Mazarinade n° C_4_35

Image de la page

Anonyme [1649], IMPRECATION COMIQVE, OV LA PLAINTE DES COMEDIENS Sur la guerre passée. , françaisRéférence RIM : M0_1687. Cote locale : C_4_35.



Ont esté faites Damoiselles,
Et combien par vn mauuais trait
De ieunes vendeuses de laict,
Ont esté faites prisonnieres.
Par des cohortes aduersaires,
Ie ne sçaurois le raconter,
Il me suffit de vous conter,
Comme la fortune ennemie
A fait cesser la Comedie,
Et que nous sommes demeurez
Tretous auec vn pied de nez.
 
 
Depuis que dame destinnée
Contre nous se fut obstinée,
Et par funestes accidens
Commença de monstrer les dens
Belle rose que l’on reuere
Comme vn S. qu’on ne feste guere,
De Villiers, Lespy, Beauchasteau
Sçauant comme vn cheual moreau,
Baron dont la grande esloquence
A contenté toute la France,
Et tous mes autres compagnons,
Nous ressemblons les champignons,
Qui n’estans (pour chose tres seure)
Cueillis & en temps & en heure,
Pourrissent, ou faute d’humeur
Deuiennent sans suc ny vigueur,
Et font plustost mal à la teste
que du bien ie vous le proteste,
Ainsi nostre credit perdu,
Nostre bon renom est cousu
D’vn fils qui tout comme vne chaisne
Apres soy nostre malheur traisne.
Enfin depuis quatre ou cinq mois
Nous sommes plus secs que du bois,
Nostre langue est comme muette :