[retour à un affichage normal]

Mazarinade n° B_9_13

Image de la page

Anonyme [1649 [?]], REQVESTE DV DVC DE VANDOSME AV PARLEMENT DE PARIS. , françaisRéférence RIM : M0_3496. Cote locale : B_9_13.

NOVS CESAR DVC DE VENDOSME, Couuerneur
& Lieutenant general pour le Roy en Bretagne, auec
tous droicts & pouuoir d’Admirauté audit pays, reconnoissons
& declarons que bien que nous ayons este de
nouueau forcez de donner ce iourd’huy vne demission par escrit de
nostredit Gouuernement, par nouuelle demission passée pardeuant
Talon & Marion Notaires au Chastelet de Paris, & que la minutte
en soit demeuree par deuers l’vn d’iceux Notaires qui est Marion ;
Ce neantmoins nous n’auons en cette seconde, non plus qu’a la
premiere passee par deuant Taçonnet & du Chesne, agy de nostre
franche volonté ; au contraire, que i’y ay esté force pour les mesmes
raisons estant dans ma premiere protestation faite au Bois de Vincennes
le 20. Decembre dernier, reconnue par deuant [1 mot ill.] Notaire
au Chastelet, subsistans, partant ie proteste de me pouruoit cõtre
ladite violence en temps & lieu, & qu’elle ne me pourra prejudicier,
puis que ce que i’en faits n’est point de ma franche volonté, & que ie
n’ose tesmoigner mon sentiment, à cause que le Roy est encor dans
l’obcession de Monsieur le Cardinal de Richelieu, seul autheur de
mon iniuste prison & du bannissement hors de ce Royaume, auquel
on m’a obligé pour obtenir malliberté & pour sauuer ma vie, ainsi
qui se peut voir par la lettre que le Roy m’a escrite, signee Louys, &
plus bas de Lomenie, en datte du 29. Decembre dernier ; dequoy ie
pretends me seruir, pour faire voir la violence qui a esté pratiquée
contre moy, tendre nulles lesdites deux demissions, & faire voir
que l’on n’a peu ny deu m’oster mondit Gouuernement, ayant desiré
pour plus grande seureté des choses susdites & de mon intention,
la faire reconnoistre par deuant le Notaire & Tabellion de
Ville-preux, en presence des tesmoins soubs-signez. Fait, escrit &
signé de ma main ce premier iour de Ianuier mil six cens trente vn.
Ainsi signé CESAR DE VENDOSME.