[retour à un affichage normal]

Mazarinade n° B_9_13

Image de la page

Anonyme [1649 [?]], REQVESTE DV DVC DE VANDOSME AV PARLEMENT DE PARIS. , françaisRéférence RIM : M0_3496. Cote locale : B_9_13.

Cette Abolition ainsi verifiée, qui leuoit le pretexte apparent
de la prison dudit Seigneur Duc, deuoit luy donner
la Liberté. Mais comme en effet, la supposition du Crime
n’estoit pas le vray motif de son Emprisonnement ; On le
presse de donner sa Demission, & par le refus qu’il en fait, on
le retient encore deux ans prisonnier. Et enfin l’on exige de
luy par la continuation des mesmes artifices sa Demission
du 19. Decembre 1630. qui fut vne nouuelle Rançon, sur laquelle
on le sort du Bois de Vincennes. Mais pource que
la datte de la prison marquoit trop apparemment la contrainte,
les mesmes qui le retirerent de ladite prison, extorquerent
encore de luy le premier Ianuier 1631. auant que de
le quitter, & l’abandonner en vne liberté toute entiere, vne
seconde Demission, sur laquelle ledit Cardinal de Richelieu
a pris des Lettres de prouision audit Gouuernement, &
pretendu en estre bien & valablement pourveu ; ne laissant
audit Seigneur Duc aucun temps ny occasion de pouuoir
reclamer l’Authorité du Roy & de la Iustice, contre vne si
grande oppression : Par la rigueur de laquelle, & pour empescher
que sa voix, & ses plaintes ne fussent écoutées, se
preualant de l’Autorité du Roy, & des artifices de sa calomnie ;
il a tousiours tenu ledit sieur Duc, ou confiné dans ses
Maisons de campagne, ou éloigné dans les païs Estrangers ;
en sorte que ledit sieur Duc n’a peu que iusques à ce iour se
pouruoir au Parlement, & Remonstrer qu’il ne peut estre
destitué de sondit Gouuernement de Bretagne en consequence
de ses Demissions, qui sont invalides ; puis qu’elles
n’ont point esté données volontairement ; ains au contraire
elles ont esté exigées de luy par force & violence, Que ledit
sieur Duc iustifie par les protestations qu’il a faites : sçauoir,