[retour à un affichage normal]

Mazarinade n° B_3_12

Image de la page

Anonyme [1652], HARANGVE FAITE AV ROY, PAR LES SIX CORPS DES MARCHANDS DE LA VILLE DE PARIS. AVEC L’ENTRETIEN D’VN MARCHAND ESPICIER, ET VN MARCHAND MERCIER, à leur retour de Pontoise. , françaisRéférence RIM : M0_1592. Cote locale : B_3_12.

gloire de ses Armes, & la conseruation de sa personne
Sacrée, ne sera & ne doit estre iamais du party d’vn
premier Ministre qui ait vne pareille puissance & authorité
qu’a euë deffunct Monsieur le Cardinal de Richelieu,
& telle que l’a euë n’agueres le Cardinal Mazarin,
pour les dangers & perils ausquels peut tomber
la personne du Roy : La raison que i’en veux donner est
appuyée sur vne question de faict, & partant inexpugnable :
Ie la tire de l’Histoire des Rois de France de la
premiere & deuxiéme Race, où il se lit que le pouuoir
des Maires du Palais estoit si grand, qu’il ne leur manquoit
que le nom de Roy, pour estre parfaitemẽt Rois,
à laquelle supréme Dignité, ils sont enfin paruenus par
leur orgueilleuse puissance, appuyée par la multitude
de leurs Creatures qu’ils auoient attachées à leur fortune
déreglée, soit par les Gouuernemens des Prouinces,
Places fortes, soit par les Charges militaires qu’ils
distribuoient à leur volonté, aussi bien que des Finances,
au moyen desquelles ils acheptoient les ames venales
qui se laissoient aller au torrent impetueux de
l’ambition de ces Maires, lesquels ont enfin esté esleuez
par la multitude de leurs Creatures à la dignité
Royalle, apres auoir confiné dans vn Cloistre leur Roy
legitime. Or est-il que l’authorité d’vn premier Ministre,
telle qu’a esté celle des Cardinaux de Richelieu &
Mazarin, estant encore plus grande que celle des anciens
Maires du Palais, qui ne doit apprehender qu’vn
premier Ministre de cette authorité n’vsurpe, soit pour
luy, soit pour ses parens, la Couronne apres l’auoir fait
tomber de dessus la teste de son Roy pour la mettre
sur la sienne ; car puis qu’vne telle perfidie a bien esté
faite par les Maires du Pallais, qui pourra asseurer
qu’vn premier Ministre qui aura vne semblable authorité
que celle de ces Cardinaux, apres la perte des Princes
du Sang, n’aura pas vne semblable ambition déreiglée ?