[retour à un affichage normal]

Mazarinade n° B_3_12

Image de la page

Anonyme [1652], HARANGVE FAITE AV ROY, PAR LES SIX CORPS DES MARCHANDS DE LA VILLE DE PARIS. AVEC L’ENTRETIEN D’VN MARCHAND ESPICIER, ET VN MARCHAND MERCIER, à leur retour de Pontoise. , françaisRéférence RIM : M0_1592. Cote locale : B_3_12.

d’Angleterre auroit esté glorieusement restably dans
son Thrône, & non mal-heureusement massacré. Vous
voyez donc, Monsieur le Mercier, que les deseruices du
Cardinal Mazarin enuers la France ne peuuent estre
pretextez par la guerre des Princes entreprise par l’expulsion
de cét indigne Ministre. Quant à la prise faite
par les Anglois de nostre Armée Nauale, &; des Pirateries
par eux faites sur nos Marchands, prouiennent
d’vne haine que les Anglois ont contre les François,
en ce que quelques Cheualiers qui auoient equippé
des Vaisseaux par l’ordre dudit Cardinal, ont pillé aussi
bien les vaisseaux Anglois que les Espagnols, & mesme
plusieurs des nostres, vous sçauez aussi bien que moy
que les Six Corps en ont fait leurs plaintes.
 
Le Mercier.
Ie ne vous parle pas du passé, sont des fautes faites
ausquelles il ne faut plus penser, mais songer aux desordres
presens ; pour à quoy remedier, les plus grands
Politiques François qui sont auprés de sa Maiesté, estiment
le Retour du Cardinal Mazarin absolument necessaire ;
ces Messieurs qui ont consommé toute leur
vie dans les plus difficiles affaires de l’Estat, doiuent
mieux iuger que vous ny moy de la conduite & experience
de Monsieur le Cardinal : C’est pourquoy il s’en
faut tenir là ; car penetrer toutes les circonstances des
choses passées, aussi bien que des presentes, nous n’en
auons, ny vne parfaite connoissance, ny le temps, il
faut laisser ces subtilitez aux sçauants speculatifs, &
retourner à nostre boutique pour continuer nostre
trafic.
L’Espicier.
Ie suis bien de vostre aduis de ne nous mesler des affaires
d’Estat, mais neantmoins ie vous feray encore
ce discours contre le Retour du Cardinal Mazarin,
aprés le quel ie laisseray le reste aux sçauans Politiques