[retour à un affichage normal]

Mazarinade n° B_8_32

Image de la page

Anonyme [1652], RELATION GENERALE, De tout ce qui s’est fait & passé dans la Ville d’Orleans, depuis l’arriuée de Mademoiselle. Auec le Recit de tout ce qui s’est passé dans la Ville de Paris, depuis sa sortie. , françaisRéférence RIM : M0_3172. Cote locale : B_8_32.

ermission de prẽdre les deniers des receptes pour cet effet,
de sorte qu’on ne peut encore rien dire de certain de ses intentions.
 
Le Mercredy 10. Auril.
Vn Courier arriua en ceste ville depesché de monsieur le
Prince à son A. R. qui luy rendit vne lettre de luy, par laquelle
il faisoit entendre à sadite A. R. qu’il auoit fait la reueuë
de toute l’armée, laquelle il auoit trouué fort leste &
capable de faire de grands exploits, s’en promettant tout
bon succés, qu’il auoit enuoyé mille cheuaux conduits par
monsieur le Duc de Beaufort, pour ranger à la raison les habitans
de Montargis qui s’estoient emparez du Chasteau, où
ils faisoient mine de se vouloir deffendre, & que s’ils ne se
rendoient on les attaqueroit le iour mesme.
Le mesme iour le sieur de Marcheuille & de Voussi reuinrent
icy de Bruxelles, qui rapporterent que le Duc de Loraine
en deuoit partir ce iour là pour venir en deça, que le
Comte de Ligneuille estoit auec ses troupes vers la Capelle,
le sieur de Fange le venoit joindre auec les siennes : mais cõme
l’entrée de ces forces Loraines depend de la demission
de monsieur le Prince pour les places de Iamets, Stenay, &
Clermont, il est croyable que ce secours ne viendra pas, si
le Duc de Loraine n’a la susdite demission.
Auant hier sur le soir la populace s’émeut derechef, & il
allu[1 lettre ill.] que les Bourgeois prinsent les armes pour empescher
que ces canailles ne pillassent l’Hostel de Neuers, ou demeure
le sieur du Plessis Guenegaud Secretaire d’Estat. Le
Mareschal d’Estampes son beau frere s’y trouua aussi auec
des Exempts & des gardes de son A. R. & sur ce qu’vn coquin
demanda à celuy qui battoit le tambour pourquoy il le
faisoit, vn Bourgeois luy donna sur la jouë, & à mesme temps
à l’ayde de ses voisins on mena ce coquin prisonnier.
Le Mareschal de Lospital a quitté son Hostel depuis Mardy
dernier, & en a fait transporter ses meubles, n’y ayant plus
que les quatre murailles : on croid qu’il n’est pas loin de Paris,
& il estoit à craindre pour luy que l’on ne luy fit insulte :
en fin, on void par toutes ces émotions populaires, & par le
discours que tiennẽt la pluspart des Bourgeois, de ceste ville,
qu’il n’y a gueres de seureré pour la personne du C. Mazarin.