[retour à un affichage normal]

Accueil > recherche > Affichage d'une occurrence en contexte

Mazarinade n° B_12_54

Image de la page

Anonyme [1652], GALIMATIAS BVRLESQVE SVR LA VIE DV CARDINAL MAZARIN. , françaisRéférence RIM : M0_1463. Cote locale : B_12_54.



Qui promettont, mais sans tenir,
Seulement pour circonuenir,
Non non, il faut pousser l’affaire
Faut les enuoyer faire faire,
Tant en fin que Dame Themis,
Ait à ses pieds Iules soumis,
Tant qu’ait le cu sur la sellette
Ce bougre de porte malette,
Pour ouyr la derniere fois
Sa tres-juste & tonante voix,
Iusqu’à ce dis-je que la Reine,
Puisse auoir lumiere ample & pleine
Des desseins de ce factieux
Et traistre si pernicieux.
 
 
On dit, mais la pensée est noire,
Et personne ne le peut croire,
Au moins si ce sont gens de bien,
Qu’elle ne le void que trop bien,
Mais d’vne veuë criminelle,
A la plus simple Damoiselle,
Que c’est pour son esloignement,
Qu’elle en veut tant au Parlement,
Que si elle ne l’a pour s’esbattre
Elle fera le Diable à quatre,
Qu’elle mettra le feu par tout,
A moins qu’elle en voye le bout,
Renuersera, Ciel, Mer & Terre,
Fera perpetuelle guerre,
Ciel & terre renuersera,
Pâtisse qui mets n’en pourra,
Que les femmes soient violées,
Toutes les Eglises pillées,
Les sujets du Roy saccagez
Par des estrangers enragez,
Qu’on ne fasse que sang espandre,
Que l’on reduise tout en cendre,
Et par le fer, & par le feu,
Qu’elle ne perd rien à ce jeu.
 
 
Voila comment le long des ruës
Chacun en conte des plus cruës,
Et sans respect de sa grandeur,
Disent tout ce qu’ils ont au cœur,
Disent à la premiere mouche,
Tout ce qui leur vient à la bouche ;
Sur tout merite chastiment,
Ce qu’ils comptoient dernierement,
Que lors que Vierges esplorées,
Qu’Allemands auoient defflorées
Se ietterent à ses genoux,
Sans s’esmouuoir, que voulez-vous ?
Dit-elle aux pauures jeunes filles,
Vrayment vous estes bien gentilles,
De m’importuner de ce rapt
Vrayment ç’àmon, ô le gros rat !
Comme si c’estoit chose infame,
Qu’vn homme baisast vne femme,
Sont-elle pas faite pour eux ?
Ce seroient des gens maupiteux,
D’auoir fait si belle rencontre,
Sans vous auoir fait faire montre.
 
 
Voila du moins, à ce qu’on dit,
La response que Reyne fit,
Response certes tres-gaillarde,
Mais populace babillarde,
En dit bien d’autres en raillant,
Dont elle ne prend point d’argent,
Tesmoin soit ce que la marmaille,
C’estoiẽt vendeurs d’huistre à l’escaille,
Disoit vn de ces jours tout haut,
La comparant à Brune-haut,
Qu’elle estoit comme elle pieuse,
Prou deuote & religieuse,
Sur tout vers sainct Aliuergo,
Dont ils se rioient à gogo,
Et qu’elle pourroit bien tant faire
Qu’on luy bailleroit son affaire,
Que nostre petit Roy Louis,
Comme vn autre ayeul de Clouis,
(C’est Clothaire qu’ils veulent dire)
Pourroit bien vn matin maudire
Ses honteuses inuentions,
Pour assouuir ses passions,
Et la dompter par vn supplice,
Digne de sa haute malice,