[retour à un affichage normal]

Accueil > recherche > Affichage d'une occurrence en contexte

Mazarinade n° D_1_33

Image de la page

Anonyme [1649 [?]], FACTVM, SERVANT AV PROCEZ CRIMINEL FAIT AV CARDINAL MAZARIN. touchant ses intelligences auec les Estrangers ennemis de l’Estat. , françaisRéférence RIM : M0_1368. Cote locale : D_1_33.


FACTVM,
SERVANT AV PROCEZ CRIMINEL
FAIT AV CARDINAL MAZARIN.

touchant ses intelligences auec les Estrangers
ennemis de l’Estat. PREMIERE PARTIE.
IL y a apparence & probabilité que le Cardinal
Mazarin s’est toûjours entendu auec les Espagnols
ennemis de la France, & qu’il a procuré
leurs auantages autant qu’il luy a esté possible, au
détriment de cét Estat.
Pour cét effet, il a depuis 2. ans malicieusement
& proditoiremẽt arresté le cours des prosperitez des armes du Roy.
Apres les prises de Courtray, Dunquerque & Furne, qui arriuerent
en 1646. il fit casser & retrancher plus de cent Compagnies
de Caualerie, & perir celles qui resterent, sans leur donner pendant
le quartier d’Hyuer ny paye, ny fourage bien que la guerre durast
toûjours, & qu’on la deust continuer à la prochaine campagne.
Il asseuroit cependant que la Paix se feroit, & neantmoins il entretenoit
secrette correspondance auec les Ministres du Conseil
d’Espagne, & auec le Marquis de Castelrodrigo, Gouuerneur du
Pays bas, enuers lequel il s’estoit engagé dés Rome, où ledit Castelrodrigo
a esté Ambassadeur du Roy d’Espagne.
N’ayant ny fait la Paix, ny preparé d’armée pour la campagne de
1647. & ayant par ce moyen donné lieu à l’Archiduc Leopold
d’assieger Armantieres, cette Place durãt au delà de son attente, &
de son desir, il blasmoit à la Cour le sieur du Plessis. Belliere de tenir
si long-temps & s’opiniastrer dãs vne Place qui deuoit estre prise.
La necessité, ou plustost la honte & les cris de toute la France,
ayant auec presse tait mettre vne armée sur pied, elle deuint par sa
resolution suffisante pour arrester les progrez des ennemis, lesquels