[retour à un affichage normal]

Mazarinade n° A_4_2

Image de la page

Anonyme [1649], FACTVM CONTENANT LES IVSTES Deffenses des Rentiers de l’Hostel de Ville de Paris: Et les moyens veritables de la seureté de leurs Rentes, & de leur conseruation. , françaisRéférence RIM : M0_1360. Cote locale : A_4_2.

que l’on sçait leur auoir esté faites, & dont le nommé
Haubert est demeuré d’accord luy-mesme en pleine assemblée
de l’Hostel de Ville, lors que les Deputez des Compagnies
les firent arrester prisonniers ; il n’y a point eu d’affaires
sur les Gabelles depuis dix-huict ans, dans lesquelles ils
n’ayent extremement profité ; ils ont fait des taxes extraordinaires
sur les Officiers les plus considerables des Gabelles, &
ont fait en suite supprimer ces mesmes Officiers, parce qu’ils
pouuoient découurir leurs fripponneries. Ils ont traicte de
plusieurs droicts qui estoient attribuez à des particuliers, &
les ont fait par apres conuertir en rentes sur les Gabelles ; ils
ont fait retrancher les gages des Officiers des Greniers à Sel,
fait faire vn nombre infiny de taxes sur eux, ils ont fait augmenter
à diuerses fois la valeur du minot de sel, & en ont traicté
à forfait, ce qui a causé la liberté du faux-saunage, & fait
le desordre vniuersel. Bref il n’y a point d’ouuerture, ny d’adresse,
outre le gain notable de leur Ferme, qu’ils n’ayent recherchée
pour opprimer le public, & satisfaire à leur ambitiõ.
 
Apres toutes ces considerations, cét engagement de huict
à neuf millions auec le Roy, apres tant d’artifices criminels
& condamnez, est il iuste de violer toutes les Loix en leur
faueur, & de penser encore à les maintenir dans vne Ferme,
dont ils ne veulẽt pas seulmẽt porter la moindre perte, quelque
profit prodigieux qu’ils ayent fait pendant 18. ans entiers.
Les demandeurs, & tous ceux qui sont interessez auec eux,
sont bien esloignez de croire, que les Adjudicataires soient
personnes necessaires au public.
La Ferme des Gabelles n’a pas esté si peu fructueuse iusques
à present, qu’il ne se rencontre plusieurs personnes qui
s’y engagent ; il y en a desia de tres-considerables & de tres-puissans
qui se presentent, il y en a encore d’autres qui paroistront,
pourueu qu’on veuille faire l’adjudication dans les
formes prescriptes par les Ordonnances, & n’on pas comme
l’on a fait dans les derniers temps : car les plus soluables & les
plus affectionnez au Roy & au public, s’estant plusieurs fois
declarez, il s’est rencontré qu’ils n’ont remporte que l’enuie,
& que les autres, qui auoient plus d’intrigues qu’eux, ont
tousiours esté preferez.