[retour à un affichage normal]

Accueil > recherche > Affichage d'une occurrence en contexte

Mazarinade n° A_4_2

Image de la page

Anonyme [1649], FACTVM CONTENANT LES IVSTES Deffenses des Rentiers de l’Hostel de Ville de Paris: Et les moyens veritables de la seureté de leurs Rentes, & de leur conseruation. , françaisRéférence RIM : M0_1360. Cote locale : A_4_2.


absolument necessaires, & de la reprendre à telles conditions
qu’ils voudroient. Et de fait il est constant qu’ils n’ont point
payé les Capitaines & les Archers de Gabelle, comme ils
auoient accoustumé, & que ce sont ceux là qui ont plus debité
de faux sel dans les Prouinces, quoy qu’ils fussent preposez
pour en arrester le cours & les entreprises.
 
Au reste il n’est pas vray que ce soit aux demandeurs à se
pouruoir contre le Roy. Comme ils ont vn Arrest du Conseil,
c’est aux Adiudicataires eux mesmes à s’addresser au
Roy si bon leur semble. Cét Arrest est encore bien plus considerable
que ne seroit pas vne simple assignation sur vn particulier,
lequel ne seroit pas receuable à renuoyer ceux qui
seroient assignez sur luy vers le Roy, il faut qu’il paye, si elle
n’a point esté reuoquée, sauf à luy à se pouruoir contre le Roy,
s’il ne luy est point redeuable.
Mais l’Arrest du Conseil meu contre les Adiudicataires, &
dont les demandeurs demandent l’execution, presuppose necessairement
que le Roy a compté auec eux, & qu’ils se sont
trouuez redeuables. Ce n’est donc point aux demandeurs à
entrer en connoissance de cause, ils ont leur condamnation
presente & asseurée. Outre que les Adiudicataires sont obligez,
tant par leurs baux, que par les submissions faites aux
Compagnies Souueraines, & à l’Hostel de Ville de payer les
rentes & les charges.
Les demandeurs pourroient conclure en cét endroit le
premier chef de leur requeste : mais ils se trouuent obligez
de satisfaire à ceux qui veulent deffendre l’Arrest
des Vaccations par les consequences du passé & de l’aduenir,
& qui ont voulu persuader au public que les Adiudicataires
ayans tesmoigné qu’ils abandonneroient si on les pressoit
dauantage, & si on ne rendoit pas Iustice à leur mode,
que l’on auoit apprehendé apres cela de tout perdre, & de
ruiner la Ferme des Gabelles, qui ne peut estre, disent-ils,
soustenuë que par eux, & par le mesme ordre & la mesme
conduite qu’ils ont pratiquée iusques à present.
Les demandeurs ne peuuent pas s’imaginer que la Chambre
des Vacations ait eu ce motif & ce principe.