[retour à un affichage normal]

Mazarinade n° A_4_2

Image de la page

Anonyme [1649], FACTVM CONTENANT LES IVSTES Deffenses des Rentiers de l’Hostel de Ville de Paris: Et les moyens veritables de la seureté de leurs Rentes, & de leur conseruation. , françaisRéférence RIM : M0_1360. Cote locale : A_4_2.

sphere, elles ne peuuent s’estendre plus loin.
 
Au fonds, l’opposition s’explique d’elle-mesme, l’Arrest
dont il s’agist a contreuenu directement à la Declaration du
mois d’Octobre, qui doit estre inuiolable, comme vne des
Loix fondamentales de l’Estat.
Quand apres le deluge Noé sortit de l’Arche auec toute sa
famille, l’Escriture dit, que Dieu fit vn pacte entre luy & les
hommes, vn pacte d’eternelle durée, & qui ne pourroit iamais
receuoir d’alteration, ny de changement, pactum fœderis
sempiterni.
Quelques Peres de l’Eglise expliquans ce passage, estiment
que le traicté ne se fit point auec les hommes : mais que
ce fut Dieu qui traicta auec soy mesme, que ce fut l’alliance
de sa bonté auec sa puissance, elles se promirent l’vne à l’autre
de ne se separer iamais.
Ceux qui ont fait reflexion sur la Declaration du mois
d’Octobre, l’ont aussi considerée comme vne alliance eternelle,
que le Roy a voulu faire de son Authorité auec sa Iustice,
elles se sont embrassées l’vne & l’autre, & fait vne vnion
si estroite, qu’elles ne se peuuent plus diuiser.
Cependant si l’Arrest de la Chambre des Vacations estoit
executé, elle sembleroit n’auoit pas assez consideré ce grand
ouurage, l’on auroit commencé à rompre & vïoler cette alliance
si sacrée, ce pacte si auguste & si precieux, & à briser les
deux Tables, dans lesquelles se trouuent si magnifiquement
grauées la grandeur du Prince, le repos & la felicité de ses
subjets.
Mais l’Arrest du Conseil rendu au mois de Iuillet dernier
enregistré en la Cour pour la seureté publique, a esté pareillement
renuersé, bien que cét Arrest eût esté rendu auec
grande cognoissance de cause, que tous les moyens des Adjudicataires
y eussent esté plainement examinez, & que le
faux-saunage fust lors beaucoup plus commun qu’il n’est pas
encore aujourd’huy.
En fin les demandeurs ont cét aduantage, que quand ils
n’auroient ny Declaration, ny Arrest, & que les choses seroient
entieres, les Adjudicataires ne pourroient pas se