[retour à un affichage normal]

Mazarinade n° A_4_2

Image de la page

Anonyme [1649], FACTVM CONTENANT LES IVSTES Deffenses des Rentiers de l’Hostel de Ville de Paris: Et les moyens veritables de la seureté de leurs Rentes, & de leur conseruation. , françaisRéférence RIM : M0_1360. Cote locale : A_4_2.

heritiers & bien tenans, responsables du deperissement des
Rentes, & demandé qu’il leur fut permis de nommer des
personnes à la Cour, qui seroient pris du nombre des Rentiers,
pour exercer toutes sortes d’actions, & que l’on changeroit
tous les trois mois s’il estoit necessaire.
 
Quoy que ceste Requeste fust pleine de Iustice, & qu’on n’en
deust point apprehender l’euenement, neantmoins les demandeurs
ayans desia experimenté le credit, & la puissance
de leurs aduersaires, ils continuent leurs Conferences dans
l’Hostel de Ville, il y auoit tous les iours de nouueaux Conseils
a prendre. Ils nomment mesme quelques Syndicqs,
personnes cognuës & de consideration, afin d’auoir soin
en particulier de la conduitte, & de la solicitation de l’affaire,
& d’executer sans bruit & sans tumulte, ce qui seroit
arresté par la Compagnie.
Aussi tost le Preuost des Marchands & les Escheuins s’escrient
qu’il y a de la cabale, que c’est vn party qui se forme
dans l’Estat, il font tous leurs efforts auec les Adiudicataires,
pour empescher la continuation de ces assemblées, par
ce qu’ils voioient la resolution qu’on y prenoit de demander
Iustice, & de faire voir au public beaucoup de choses contraires
à leur deuoir & à la dignité de leurs Charges, & de
leurs emplois. Ils excitent mesme & empruntent la voix du
Substitud de Monsieur le Procureur General, qui seruoit
dans la Chambre des Vacations, on luy fait requerir par
deux fois des deffenses de continuer les assemblées, l’on traicte
les Rentiers (qui demandent leur bien) de perturbateurs
du repos public ; par deux fois la Requeste est rejettée, l’on
n’abandonne point, on le fait requerir pour vne troisiesme
fois.
Les demandeurs voyans cette opiniastreté, apprennent
aussi tost qu’il y auoit des personnes qui appuyoiẽt fort le dessein
& l’entreprise du Preuost des Marchands, & des Adjudicataires.
L’vn de Messieurs, parent au degré de l’Ordonnance,
s’en déporte volontairement, & à l’esgard de quelques
recusations la Cour se trouue partagée.
Comme l’affaire ne pouuoit estre départie qu’apres la