Mazarinade n° A_4_2
Image de la page
Anonyme [1649], FACTVM CONTENANT LES IVSTES Deffenses des Rentiers de l’Hostel de Ville de Paris: Et les moyens veritables de la seureté de leurs Rentes, & de leur conseruation. , françaisRéférence RIM : M0_1360. Cote locale : A_4_2.
pussent renuerser tout ce qui auoit esté fait par le Conseil,
par toutes les Compagnies Souueraines, & par le Parlement
les trois Chambres assemblées.
La Chambre des Vacations donne dont des Deputez, la
Chambre des Comptes en donne aussi, la Cour des Aydes
enuoye les siens, l’on assemble tout le Conseil de Ville.
Les Adjudicataires s’y trouuent auec les Rentiers, l’on
entend les vns & les autres separément, & comme s’il n’y eut
point eu de Declarations verifiées, ny d’Arrests du Conseil
enregistrez au Parlement, l’on traicte l’affaire tout de nouueau,
le Preuost des Marchands flatte les Adjudicataires, il
les prie d’entrer en quelques offres, qu’ils fassent vn effort,
que l’on se départira de l’effect de la Declaration, & de tout
ce qui auoit esté ordonné par les Arrests.
Les Rentiers sont aussi entendus, le Preuost des Marchand
leur parle, & comme s’il eust voulu se seruir de la foiblesse,
qui se rencontre ordinairement dans des personnes
de tous aages & de toutes conditions, & qui se sont confusement
assemblées, il les exhorte à se departir de leurs Arrests,
que s’ils demandent Iustice, ils courent risque de tout
perdre, que les Adiudicataires abandonneront, qu’il ny à
que cette seule voye en France pour soustenir vtilement les
Gabelles, qu’il n’y à point d’autre compagnie assez forte
pour l’entreprendre, Bref, que toute la fortune de l’Estat se
trouuoit aujourd’huy renfermée dans la seule personne des
fermiers.
Ce discours augmente incontinent les soupçons, & les
deffiances, tout le monde estant pressé des mesmes douleurs,
on parle en foule, la voix des meres se mesle auec celle des
enfans, ce ne sont que cris, que clameurs, & que gemissemens.
Mais comme la Iustice ne se rend pas tousiours par les
seuls mouuemens de la nature, que les accens tristes & lugubres
ne sont pas tousiours les plus legitimes, dix ou douze
personnes choisies, & des plus intelligentes respondent pour
tous les autres, l’on fait voir à l’Assemblée que les Arrests
que les Adiudicataires ne vouloient pas executer, estoient
Image de la page