[retour à un affichage normal]

Mazarinade n° A_4_2

Image de la page

Anonyme [1649], FACTVM CONTENANT LES IVSTES Deffenses des Rentiers de l’Hostel de Ville de Paris: Et les moyens veritables de la seureté de leurs Rentes, & de leur conseruation. , françaisRéférence RIM : M0_1360. Cote locale : A_4_2.

retardée, le Preuost des Marchands ne s’en met point
en peine, l’on ne ressent les effects d’aucune sorte de Iustice.
 
Les Adiudicataires des Gabelles se trouuent plus hardis
que les autres, ils s’asseurent sur leur credit & sur leur fortune,
plus forte & plus puissante que les loix.
Comme ils se voyent pressez, & du temps, & des plaintes
de ceux qu’ils auoient si long temps entretenus d’esperances
inutiles, ils presentent leur Requeste au Conseil, par laquelle
ils demandent à estre deschargez de leur bail sous pretexte
des grands prests qu’ils auoient faits au Roy, & du faux saulnage
qu’ils auoient eux mesmes fauorisé, parce qu’ils n’en
portoient point la perte.
Cette Requeste fut trouuée de si mauuaise foy & si iniurieuse
à l’authorité des choses iugées, qu’elle fut hautement
rejettée par le Conseil, qui declara en presence des Rentiers,
que le Roy entendoit que l’Arrest rendu au mois de Iuillet
fut pleinement executé, & que les rentes fussent payées.
Apres cela il sembloit que les Adiudicataires ne peussent
plus trouuer de protection dans leurs mauuais desseins, neantmoins
ils ne se relaschent point, ils trouuent vn autre azile,
ils s’addressent au Preuost des Marchands & aux Escheuins,
ils leur font signifier la mesme Requeste, le desistement &
l’abandonnement de leur bail.
Des personnes tres-peu intelligentes, ou bien intentionnées
n’eussent pas manqué de faire saisir en mesme temps les
effects des Adjudicataires, ils n’eussent pas mesmes pardonné
à leurs personnes, puis qu’vn abandonnement de cette
qualité, estoit vne forme de faillite & de banqueroute, punissable
par la rigueur des Loix & des Ordonnances.
Mais cela n’auoit pas esté ainsi concerté, on laisse encore
passer quelques iours, on donne le temps qu’il falloit pour diuertir
tous les effects, qui pouuoient seruir à la seureté publique.
Le Preuost des Marchands & Escheuins en viennent
apres cela aduertir la Chambre des Vacations, ils ne demandent
pas l’execution des Arrests comme ils deuoient : mais
qu’on enuoye seulement des Deputez, afin que peu de personnes