[retour à un affichage normal]

Mazarinade n° A_2_62

Image de la page

Anonyme [1649], EXAMEN SVR LES AFFAIRES DV TEMPS. , françaisRéférence RIM : M0_1321. Cote locale : A_2_62.

que dans les conionctures qui ont precedé, &
qui ont suiui tant les premieres barricades que les secondes,
& generalement dans tous ces desordres, qui
nous menacent d’vne veritable guerre ciuile, si celuy
qui manie le cœur des Princes, & des sujets ne leur
inspire les mouuemens du repos & de la concorde.
Car à bien examiner les desseins de Messieurs les Ministres,
on y trouue tant de cheutes, & tant de foiblesses,
qu’il semble que ce soit plutost vne raillerie,
qu’vne entreprise serieuse, & vne farce plutost qu’vne
tragedie. Cruelle raillerie pourtant, horrible farce,
qui ne peut diuertir que les Demons, & que le
reste de nos ennemis.
 
La premiere, & la plus importante de toutes les
fautes que Messieurs les Ministres ayent faittes dans
les occasions presentes, c’est de n’auoir pas eu le bien
de l’estat pour obiet, mais plutost leurs interests particuliers,
qui est iustement la cause efficiente de la Tyrannie,
ou pour mieux dire de l’oligarchie qu’ils vouloient
continüer en France, ou elle est establie depuis
vingt-cinq ou vingt-six ans. Ils vouloient que les reuenus
du Roy fussent tousiours en party, & qu’il se
trouuast des personnes qui luy auançassent de l’argent,
parce qu’ils entroient eux-mesmes dans cet infame
negoce, & que sous le nom odieux des Monopoleurs,
ils exerçoient vn iudaïsme d’vsures, & de rapines
plus pernicieux à l’estat, que la circoncision
mesme, puisque celle-cy est soufferte dans des estats
florissans, & bien policez, & que l’autre ne le sçauroit
estre long-temps sans leur causer vne ruine ineuitable :