[retour à un affichage normal]

Accueil > recherche > Affichage d'une occurrence en contexte

Mazarinade n° A_9_9

Image de la page

Saint-Julien,? [?] [1650], LE COVRRIER BVRLESQVE DE LA GVERRE DE PARIS, Enuoyé à Monseigneur le Prince de Condé, pour diuertir son Altesse durant sa prison. Ensemble tout ce qui se passa jusques au retour de Leurs Majestez. , françaisRéférence RIM : M0_814. Cote locale : A_9_9.



Mais il s’engagea trop auant,
Les ennemis estoient deuant,
Qui sans considerer son âge
Le traitterent auecque rage,
Parce qu’il auoit presque occis
De leurs Caualliers cinq ou six :
Ils le chargerent, le blesserent,
Et dans Vincennes le traisnerent,
Où le lendemain son deceds
Finit sa vie & son procez.
Lors on eut aduis veritable
Qu’à S. Germain (chose effroyable !)
Monseigneur, vous auiez nuds mis
Tous les gens que vous auiez pris,
Et que sans balle & sans raquette
Ils estoient en grande disette
Enfermez au tripot du lieu,
N’ayant reconfort que de Dieu.
 
(Madame
de
Rohan
en la
Requeste
que
elle presenta,
dit, que
Tancrede
estoit
par le
toupet
qu’il
auoit.)
 
Le Lundy premiere iournée,
Du second mois de cette année,
Vous fistes le determiné,
Dont il prit mal à Fontenay,
A Sceaux, Palaiseau belle terre,
Où vos barbares gens de guerre
Firent és maisons & clochers
Pis que n’auroient fait des Archers,
Où les volleurs de S. Sulpice :
Car ils prirent iusqu’au Calice,
Pisserent dans le benestier,
Assommerent vn Marguillier,
Des surplis firent chemisettes,
Et beurent le vin des burettes,
Prirent le liure d’Oremus
Qu’ils ne respecterent pas plus.
Le Mardy n’est pas remarquable.
Ieudy quatre. Sortant de table
Où l’on seruit force rosty,
Monsieur le Prince de Conty,
Suiuy d’vn grande cohuë
Fit faire à ses Gardes reueuë,
Où se trouua Monsieur d’Elbeuf,
Qui n’auoit pris qu’vn jaune d’œuf,
Tant son ardeur infatigable
Le laissoit peu dormir à table.
 
2. Fevr.
4. Fevr.
 
Iour que pour nous faire du mal
Sçachant que force bestial
Nous venoit du costé de Brie,
Bled, farine autre drollerie,
Qui sauuoit Paris de la faim,
Et qui rompoit vostre dessein,
Vous pensastes mourir de rage,
Et pour nous boucher ce passage,
Ayant en vain attaqué Bry,
Qui n’estoit vostre fauory
Depuis qu’à vos belles cohortes
Il auoit refusé les portes,
Vous tournastes vers Lesigny,
Chasteau iadis à Conchiny,
Où de la canaille rustique
Ce iour à vos gens fit la nique,
Et quelques soldats au milieu
Venus de Bry voisin du lieu,
Respondirent auec rudesse,
Ie sons vallets de son Altesse,
Ce sera pour vne autre fois.
 
 
Ce fut le cinquiesme du mois,
Que quelques trouppes ennemies
Pour poursuiure leurs volleries,
Et le degast du plat païs,
Prirent leur vol de S. Denis.
Helas ! que tu deus estre en trance,
Pauure Mesnil Madame Rance,
Ce iour c’estoit à toy le dez,
Tes murs n’estoient pas bien gardez :
Ils mirent au fil de leurs lames
Enfans, vieillards, hommes & femmes,
Et firent acte de larrons
Par tous les bourgs aux enuirons.
 
5. Fevr.
 
C’est ce iour, si ie ne me blouze,
Que l’Archeuesque de Thoulouze
Reuint icy de Sainct Germain :
Mais non, ce fut le lendemain,
Nenny, ce fut ce iour-là mesme
Qu’estant allé dés le troisiesme
Y faire predication
De nostre bonne intention,
En guise d’vne remonstrance,
Il ne pût auoir audience,
Et sans qu’on l’oüist, il auint
Que le zelé Prelat reuint.
 
 
Ce iour merite quelque notte,
Puis que le Mareschal la Motte,
Et le vaillant Duc de Beaufort,
Qu’on appelloit frappe d’abort,
Sortis auec Caualerie
Pour purger les chemins de Brie