[retour à un affichage normal]

Accueil > recherche > Affichage d'une occurrence en contexte

Mazarinade n° A_2_45

Image de la page

Anonyme [1649], DISCOVRS SVR LE GOVVERNEMENT DE LA REYNE DEPVIS SA REGENCE. , françaisRéférence RIM : M0_1149. Cote locale : A_2_45.


inuitez-les à vostre imitation, à rendre le respect
qu’ils doiuẽt à leur Roy & à leur Reyne. S’ils considerẽt
ce qui se fait dans leurs maisons & dans leurs Ames, ils seront
si empeschez à y établir vn bon ordre, que ie croy
qu’ils ne penserõt plus à vouloir corriger ceux qui les surpassent
en vertu aussi bien qu’en condition. Faites leur
souuenir qu’ils sont Chrestiens ; & par consequent que
leur deuoir est d’adorer vn Dieu auec toutes les puissãces
de leur ame, d’aimer leur prochain pour Dieu, & ne rien
haïr pour l’amour de luy ; & faites encore ce que vous
pourrez pour leur persuader que s’ils se font justice à eux
mesmes, ils se rendront dignes de leur salut, par le merite
du Sang de leur Sauueur. Ie m’asseure alors, Que nôtre
Reyne Tres-Chrestienne, voyant que ces ames qui ont coûté
la mort d’vn Dieu sur le Caluaire seront ainsi changées
en des victimes offertes à leur Createur en sacrifice,
oubliera par sa generosité toutes leurs foibles entreprises :
& en nous honorant icy de sa presence auec celle
du Roy son Fils, elle fera naistre vn autre Siecle d’or
par la Paix vniuerselle qu’elle nous donnera. Enfin cette
grande princesse nous ayant ainsi comblez de ses faueurs,
nous pourrons esperer que Dieu nous comblera
encore de ses graces ; & qu’apres qu’il nous aura fait
joüir icy bas de cette paix tant desirée ; il nous fera joüir
vn jour dans le Ciel d’vn repos eternel.
 

FIN.