[retour à un affichage normal]

Mazarinade n° B_19_47

Image de la page

Lorme, J.-C. de [1649], L’APOLOGIE DV THEATRE DV MONDE RENVERSÉ OV LES COMEDIES ABBATVES DV temps present. Par I. C. D. L. , françaisRéférence RIM : M0_116. Cote locale : B_19_47.

AV LECTEVR
SALVT.
IL est necessaire auiourd’huy, Lecteur, que tu prenne la peine s’il te plaist,
de lire ou d’escouter lire l’Apologie du Theatre du monde renuersé, ou les
Comedies abbatuë du temps present ; l’Autheur ayant vsé d’vne telle diligence
à l’abbatre, que ie puis dire que les fueilles estoient encores humides quand
ce Theatre fut acheué : Tu en auras l’entiere obligation à de Lorme & non
pas à la volonté de l’Autheur, qui sera bien esbaby, qu’vne piece qu’il
vouloit estre particuliere, ait esté renduë commune. Neantmoins il n’y a rien
qui le puisse fascher de la voir dispersée en cinq parties de diuerses iournées,
pour la faire voir au public, & il y a toutes les apparences du monde que l’autheur
n’auoit pas dessein de monstrer quel est son esprit sur vn si petit chef-d’œuure.
Il aura pourtant sujet de se consoler du desplaisir qu’il en pourroit
auoir, quand il verra que c’est le premier monde qui va commencer de paroistre.
Tu me dois cependant sçauoir gré de l’artifice duquel ie me suis seruy
pour te le faire voir. Bien qu’il ne soit que promptement ébauché, il donnera
peut-estre autant de satisfaction à ton esprit, que pourroit faire vne
piece plus finie. Ie vous dis adieu, cher amy Lecteur, & en attendant tout
le reste, &c.

Valete & Plaudite.