[retour à un affichage normal]

Accueil > recherche > Affichage d'une occurrence en contexte

Mazarinade n° D_1_55

Image de la page

Du Tillet [signé] [1652], TRES-HVMBLES REMONSTRANCES PAR ESCRIT FAITES ET PRESENTEES AV ROY PAR MESSIEVRS DV PARLEMENT DE PARIS EN LA VILLE DE SVLLY SVR LOIRE, CONTRE LE RETOVR ET POVR l’esloignement ou la punition du Cardinal Mazarin. , françaisRéférence RIM : M0_3841. Cote locale : D_1_55.


des anciennes frontieres, de soudoyer vne excessiue multitude d’Estrangers,
qui ne combattent que pour la montre, qu’on auoit sujet
d’apprehender ou la disette d’argent, si on vouloit contenter tant de
personnes, & les maintenir dans la discipline, ou qu’estant violee
à faute de payement, vos Prouinces seroient exposees à la licence
& au desespoir des soldats, qui les ont traittees depuis trois ans auec
toutes sortes d’hostilitez & de barbaries. Qui doute que le Cardinal
Mazarin qui a voulu auoir tout seul la direction de la guerre, ne soit
la veritable cause de tous les maux que n’auons soufferts, qui se sont
rendus insuportables, lors qu’on a pû fournir aux extraordinaires
despenses de celuy, qui les ayans faites sans regles & sans fidelité,
nous a enfin jette dans l’impuissance que luy mesme a découuert
aux Ennemis dans les Lettres qu’il a escrites à vostre Majesté, & à la
Reine vostre Mere.
 
Iugez, SIRE, s’il auoit trouué les moyens d’acquerir la creance,
qui est necessaire à vn homme employé aux grandes affaires de
vostre Estat, & qui doit faire valoir vostre authorité ; Le Cardinal
Mazarin ne sçauoit pas qu’vn Royaume remply de personnes de
bon esprit & genereux ne pouuoient demeurer long-temps dans
vne seruitude qui luy est dommageable & honteuse, ny supporter
tousiours celuy qui est hay & mesprise tout ensemble. Il a esté si souuent
auerty de l’vn & de l’autre par les plaintes publiques, par nos
frequentes Remonstrances, par les mécontentemens de ces Peuples,
qu’il y a dequoy s’estonner de ce qu’vn homme ayant la connoissance
de ces choses & de vos Declarations & Arrests de tous
vos Parlemens qui l’ont banny de ce Royaume, a eu l’asseurance d’y
reuenir pour esmouuoir de plus grands bruits, cherché des perils
plus certains, encouru plus de reproches & donné lieu à des condemnations
plus seueres mais équitables. Quand le Cardinal Mazarin
pensera à ce qui est arriué il y a trente ans à vn homme de sa nation
beaucoup moins criminel que luy, il iugera les dangers dans lesquels
il s’est precipité.
SIRE, Nous ne pouuons satisfaire au deuoir de nos charges &
à nos consciences, qu’en protestant à Vostre Majesté qu’il nous seroit
imputé à crime, que de vous dissimuler les maux que ce funeste
retour du Cardinal Mazarin va produire, si Vostre Majesté n’y remedie
au plustost, & ne considere combien il importe à sa reputation,
authorité & seruice, de ne laisser pas long-temps Monsieur le Duc
d’Orleans vostre Oncle, & Messieurs les Princes de vostre Sang
dans les ressentimens où ils sont pour les affaires passées, & dans les