[retour à un affichage normal]

Mazarinade n° A_6_85

Image de la page

Anonyme [1649], OBSERVATIONS CVRIEVSES, SVR L’ESTAT ET GOVVERNEMENT DE FRANCE. Auec les Noms, Dignitez & Familles principales, Comme il est en la presente année 1649. , françaisRéférence RIM : M0_2568. Cote locale : A_6_85.

REQVESTES DV PALAIS.
CE sont Conseillers de la Cour du Parlement qui sont
enuoyez en cette Compagnie, pour cognoistre des
procez & differens concernans le titre de tous les Offices
Royaux de France, tant de iustice, domaine, finances, que
de la maison du Roy au dessous de 5000. liures, les autres
ayant leurs causes commises aux Requestes de l’Hostel. COVR DES MONNOYES.
ELLE est establie pour cognoistre, iuger & decider en
dernier ressort de toutes les monnoyes de France : &
pareillement des fautes, abus & maluersations qui se commettent
au fait d’icelles, tant par les Maistres, qu’Officiers,
qui sont en grand nombre distribuez par les Prouinces &
places du Royaume. TABLE DE MARBRE.
DEVANT que le Palais fût bruslé il y auoit dans la grande
Salle vne Table de Marbre, qui donne encore le
nom à deux grandes Iurisdictions, l’vne concernant les Eaux
& Forets : l’autre pour la Marine, Havres & Ports maritimes.
Celle des Eaux & Forets a son grand Maistre, qui s’appelle
Monsieur de Fleury. Il l’est par toutes les riuieres, forets &
communautez de France, presque dans toutes les villes il y
a Siege establi pour ce mesme fait, & des Iuges qu’on apele
Maistres des Eaux & Forets. SIEGES PRESIDIAVX.
IL y en a plusieurs en France, en chacun desquels il y a vn
Seneschal, ou Baillif, vn President, vn Lieutenant Ciuil,
vn Lieutenant Criminel, vn Lieutenant Particulier, vn Assesseur,
25. Conseillers, vn Procureur, & deux Aduocats
du Roy.