[retour à un affichage normal]

Accueil > recherche > Affichage d'une occurrence en contexte

Mazarinade n° C_7_35

Image de la page

Anonyme [1649], DISCOVRS D’ESTAT OV VERITABLE DECLARATION des Motifs, qui obligerent LOVYS LE IVSTE, Roy de France & de Nauarre, à rompre la paix qui fut faicte en l’an 1596. Entre HENRY IIII. son tres-honoré pere, & PHILIPPES II. Roy des Espagnes. OV SE VOIT LE NOMBRE DES places & des Principautez, que les Espagnols ont deuant ce temps la & du depuis vsurpées à ceste Couronne. , françaisRéférence RIM : M0_1108. Cote locale : C_7_35.


auquel le pere auoit laissé par testament partie
de la Sicile : Conradin se retira en Allemagne,
& le Pape Vrbain interdit Maintfroy,
pour l’execution duquel intredit, Charles
d’Aniou, frere du Roy Sainct Louys, fut appellé
à Rome, & Couronné Roy de Naples,
& de Sicile : auec ce droit il attaque Maintfroy,
luy donne bataille & le deffait : Conradin sur
le bruit de ceste disgrace, leue de grandes forces
en Allemagne, & s’estant ietté dans la
Poüille, Charles luy vint au deuant, le mit
en fuitte, & estant pris ainsi qu’il se sauuoit
par mer, il luy fit trancher la teste, & par
ceste mort, il se vid paisible possesseur de ces
deux Royaumes.
 
Toutesfois il n’en iouït pas long-temps,
car Pierre d’Arragon son Competiteur, estant
aduerty du mescontentement que les Siciliens
auoient contre les François, pour les grandes
priuautez dont ils vsoient enuers leurs femmes,
il enuoya en Sicile vn Cordelier nommé
Iean Prochyte, pour mesnager l’occasion
qui se presentoit, de s’emparer de la Sicile. Ce
demon incarné fut de ville en ville, representant
au peuple l’insolence des François, les
droits pretendus de Pierre d’Arragon son Maistre,
le desir qu’il auoit de les secourir, lors
qu’il les verroit en estat de le reçeuoir. Auec