[retour à un affichage normal]

Mazarinade n° C_7_72

Image de la page

Anonyme [1649], L’ENTRETIEN SECRET DE MESSIEVRS DE LA COVR DES. GERMAIN, AVEC MESSIEVRS DE LA COVR DE PARLEMENT DE PARIS. , français, latinRéférence RIM : M0_1244. Cote locale : C_7_72.

du Royaume, non pas mesme à tout vostre Corps ? Estoit-il
à propos de risquer en vne affaire de telle consequence, où il y
va de tous les interests du Roy & du Royaume, & de se mettre
en hazard d’estre obligé de dire, nous auons esté trompez ?
 
Vous adioustez en suitte, que comme les interests de ceux
qui entreprennent sur l’autorité Souueraine, sont tousiours contraires
à l’interest d’vn Souuerain : Vous auez veu sous son Ministere
vn vsage de Politique estrange, & toute opposée à nos
mœurs ; Les vrays interests de l’Estat abandonnez ou trahis, la
continuation de la Guerre, l’éloignement de la Paix, les Peuples
espuisez, les Finances dissipées ou destournées, tout ce qu’il y a
de considerable dans le Royaume, ou corrompu ou opprimé,
pour assuiettir tous les François sous la puissance d’vn seul
Estranger. Et finalement l’Estat au poinct où il est, à la veille de
sa ruine. Vous dites qu’il a tousiours voulu continuer la guerre,
& esloigner la Paix, afin de se rendre plus necessaire, & auoir
plus de pretexte de leuer de grandes sommes de deniers pour
s’enrichir : Qu’on a descouuert en plusieurs occasions qu’il a
empesché nos succez, pour faire balancer les affaires ; Tesmoins
nos Armées perduës faute de subsistance deuant Lerida ; les
foibles secours de Naples enuoyés à contre-temps ; le Siege de
Cremone, la perte de Courtray, & autres actions de cette
qualité.
Mais seroit-il possible que des Esprits cõme les vostres, n’auroient
point preueu tous ses euenemẽs en vn Ministre de cette
condition : Puisque les gens mesmes de Village les preuoyoient
& s’en plaignoient par auance, dés lors qu’on sceut à la Campagne
que vous l’auiez admis, ou du moins que vous le souffriez
au gouuernement de la France ? Que pouuoit-on attendre autre
chose d’vn Sicilien, d’vn Espagnol-Italien, d’vn homme de
sa naissance & de son education ?
Vous dites que si la propre confession de ce Cardinal peut
seruir à le conuaincre, apres auoir dit tant de fois, qu’il tenoit la
Paix entre ses mains, outre la voix publique qui le declare par
tout, & la chose qui parle d’elle-mesme : Il n’est que trop euident
qu’il a trahi nos vrais interests en cette affaire si importante.
Vous dites que cette seule preuarication en vn sujet de
cette qualité, meritoit vn supplice qui égalast en quelque sorte
les miseres & les desolations qu’elle a causées. D’où l’on peut