Mazarinade n° A_3_28
Image de la page
Anonyme [1649], L’ENTRETIEN SECRET DE MESSIEVRS DE LA COVR DE S. GERMAIN, AVEC MESSIEVRS DE LA COVR DE PARLEMENT DE PARIS. , français, latinRéférence RIM : M0_1244. Cote locale : A_3_28.
coins du Royaume ? Les auez-vous ignorez, lors que tout les
monde les sçauoit ? Et si vous les auez sceu, comment n’y auez-vous
pas pourueu ? Qui le pouuoit & qui le deuoit, que ceux qui
sont establis pour cela ? qui sont les Anges Tutelaires de l’Estat,
qui sont les Tuteurs des Roys, & les Protecteurs du Peuple ? Et
pouuez-vous estre Iuges, & Iuges Souuerains, & Souuerains au
poinct que vous l’estes, si vous ne pouuez rompre l’effort de
l’iniustice par l’autorité de la Iustice ?
Comment souffrez-vous que dans vn Royaume qui se vante
d’estre tres-Chrestien, le Paganisme & le Mahometisme y
ayent plus de vogue, que l’Euangile ? Comment souffrez-vous
que Iesus-Christ ait moins de credit à Paris & dans la France,
que Mahomet à Constantinople, & dans l’Empire du Sultan ?
Comment permettez-vous qu’il y ait tant de François, dont
l’on pourroit compter le nombre des paroles par celuy de leurs
blasphemes ? & la quantité de leurs crimes, par celle de leurs
actions ? Comment souffrez-vous qu’on dise, qu’il faut faire vn
Dieu nouueau, & que celuy que nous adorons, est trop vieux ?
Ignorez-vous qu’il n’y ait des hommes dans Pairs, qui ont honte
de se voir encor reduicts à pratiquer les vieilles impietez,
manque d’en pouuoir inuenter de nouuelles ? qui trauaillent
pour en chercher, auec plus de passion que nous ne trauaillons
pour nostre salut ? & qui croyent quand ils en ont trouué, auoir
merité des Couronnes. L’on fait, Messieurs, ce qu’on ne peut ny
penser, ny dire sans horreur. Et tout cela à vostre veuë, à deux
doigts de vostre Tribunal. Vous le voyez, vous l’entendez : Mais
aprés cela, vous faites comme si vous ne le voyez point, comme
si vous ne l’entendiez point.
Que veut dire, Messieurs, qu’on n’oseroit auoir violé vn de
vos Arrests ? il y va de l’honneur & de la vie si on l’auoit attenté ;
Et vous souffrez qu’on se mocque des Commandemens de
Dieu & de l’Eglise. On n’oseroit auoir attaqué vne seule de vos
Ordonnances, parce que vous les estimez iustes, & qu’elles le
sont en effet : Et vous exposez au mespris public celles du Symbole
& du Decalogue, qui sont les Regles de toute Iustice.
Vous vous passionnez si fort pour vos propres interests, & vous
estes si indifferens pour ceux de Iesus-Christ, dont le salut dépend.
Ne sommes-nous pas à la veille de voir vne nouuelle Secte
dans ce Royaume, qui succedera à celle de Caluin & de Luther,
Image de la page