[retour à un affichage normal]

Mazarinade n° B_15_27

Image de la page

Anonyme [1652], L’AVTHORITÉ DES ROYS, DES PRINCES, DES REPVBLIQVES, ET DES PARLEMENS. Presenté au Roy dans la Ville de Pontoise par vn grand Prelat. , françaisRéférence RIM : M0_434. Cote locale : B_15_27.

bien viure, & estre sans Roy, mais vn Roy ne
peut estre Roy sans peuple. Et ainsi se verifie ce qui dit
communement, que les Prelats & Superieurs spirituels
& Temporels, sont puisnez du peuple : Et que tout le
peuple ensemble vaut mieux que le Prelat & Superieur.
 
Chassez donc (ie vous supplie) bien loing arriere
de vous, tous les Malletostiers & donneurs de memoires,
au dommage du peuple & de la chose publique,
Et faites, pour l’honneur de Dieu, faire le procez à
tous Partisans François & estrangers, lesquels ayans
trouué le morceau friant ont, comme l’on dit, gagné
de l’appetit en mangeant, & sont à la fin deuenus
aussi grands maistres en ce mestier que les Italiens,
sangsuës du pauure peuple, inuenteurs, ministres, &
executeurs de tous les Edicts de Daces, & imposts,
par le moyen desquels ce Royaume est si desolé, & reduit
en tel accessoire, que tout y est à vendre & tellement
à vendre, que l’on peut dire que tout d’vn coup,
Royaume à vendre : Ainsi que l’on disoit de Rome
(Cité à vendre) lors qu’elle commença à se perdre.
Faites informer contre ceux de vostre Cour & Conseil,
qui ont eu part aux marchez, ou qui ont touché
les grands presens (que l’on appelle pots de vin) pour
faire accorder les bons marchez de cette mauuaise
marchandise. Et quand vous les aurez descouuerts
(ce qui est fort facile) faites en faire bonne Iustice par
vostre Parlement, & ne feignez pas de luy bien recommander
cét affaire : Et Dieu vous en benira, &
fera prosperer tres-amplement.