[retour à un affichage normal]

Mazarinade n° E_1_130

Image de la page

Anonyme [1649], DIALOGVE ENTRE LE ROY DE BRONZE. ET LA SAMARITAINE. Sur les affaires du temps present. , françaisRéférence RIM : M0_1090. Cote locale : E_1_130.

DIALOGVE
ENTRE LE ROY DE BRONZE,
& la Samaritaine.
Sur les affaires du temps present.
HENRY IV. QVELLE heure est-il, voisine ? SAM. Sire, nos
ressorts sont tous si détraquez, que ie ne crois
pas que sans miracle on puisse rendre aux mouuemens du balancier
& des rouës leur premiere harmonie. On ne sçait icy qui croire
de l’oreille ou de l’œil. L’Eguille marquant dix heures au Cadran,
dement le Tymbre qui vient d’en sonner onze : & ie ne doute
point que si mon compere Iacquemart viuoit encore, cela ne
mist son esprit hors de game ; quoy qu’à ce qu’il me disoit ordinairement,
il sonnât les heures sans s’amuser à les conter, ayant
bien d’autres soins. H. Luy, d’autres soins ? SAM. Ouy, Sire.
estant, comme il estoit, vn des bons Politiques de son temps,
H. A ce compte, s’il viuoit encore pendant la minorité de mon
petit fils, il auroit droit d’aspirer au rang de Ministre d’Estat.
S. Pourquoy non, Sire, aussi bien que deux faquins qui le sont
maintenant ? Auoit il moins de merite qu’eux ? Si son esprit estoit
grossier & pesant, le leur est-il plus vif ou plus penetrant ? Si sa
bouche estoit muette, les leurs sont elles plus eloquentes ? Estoit-il
Espagnol ? estoit-il Italien ? N’estoit-il pas François & des plus
des-interessez ? Pouuoit-on raisonnablement luy reprocher le
moindre des crimes, dont la Voix publique les accuse ? La fourbe
& la supercherie l’auoit elle éleué au rang sublime où Paris le
voyoit, comme l’vn d’eux à celuy des Abbez ; & l’autre à celuy
des Princes de l’Eglise ? Estoit-il, comme ce dernier, homme à
violer les loix humaines & diuines ? à brauer insolemment l’honneur
& l’auctorité des Cours Souueraines ? à n’espargner pas mesme
les Princes du Sang, emprisonnant les vns, & chassant les autres ?
à rauir le gouuernement d’vne Prouince à des Heros dignes