plus souuent infectent ceux qui en approchent,
ou comme des espines qui picquent ceux qui
les touchent ou bien comme vne glace fragile
qui se rompt sous les pieds de ceux qui
marchent dessus. Que si Iule Mazarin eut
eu moins d’ambition & plus de prudence
ou de preuoiance, il ne seroit pas aujourd’huy
si malheureux & nous serions sans misere
il seroit en faueur & nous en repos, bref
nous aurions nostre liberté & nostre Roy, & luy
n’auroit pas esté iugé ny condamné, comme vn
criminel d’Estat, coupable de Leze-Majesté. Cõmettant
vn crime en la sacrée personne de son souuerain,
qui doit estre la cause de sa ruine aussi bien
que le commencement de sa disgrace.

Si ie pensois qu’il y eut quelqu’vn mal informé
de ses deportemens ie les representerois aussi naïuement
dans ce papier qu’vn Peintre le pourroit
faire dans vn tableau : mais puis qu’ils ont assez paru
aux yeux de tout le monde, pendant que nous l’auons
veu dessus la montagne & dans son char de
triomphe, il suffit de vous exposer seulement ceux
desquels vous n’auez pas encor eu cognoissance.

Les affaires de ce Royaume estoient en cet estat,
que nous estions sur le poinct de voir bien-tost
calmer l’orage qui s’estoit eleué contre nous, &