sortit deux ou trois goutes de sang, qui furent recueillies de quelques
vns, & meslées avec l’Hostie, pour en composer des charmes.
Bon Iesus, c’est vous crucifier vne autre fois autant qu’on
le peut faire ; & la pitié, c’est que souvent on fait cét exercice de
piquer des Hosties, pour renouveler vos outrages : Car j’en ay veu
mesmes piquer de celles qu’on consacre au Sabat, bien qu’il n’en
soit jamais sorty de sang, ainsi qu’il en est coulé des autres consacrées
à l’Eglise.

Certain Prestre apporta vne fois quelque Hostie, pour estre
brûlée. On en veut à Iesus-Christ dans cette maudite assemblée
des meschans, & leur rage est specialement contre luy : mais nôtre
Seigneur parust, qui foudroya le Prestre, dont il ne resta pas vn
atome, & l’Hostie fut enlevée en haut visiblement. Les Demons
s’enfuirent au moment de cette apparition ; & tous les assistans
furent épouuentablement menacez de Iesus-Christ. Mais ni cét
exemple de châtiment, ni les menaces du Sauveur, n’empescherent
pas la continuation de leurs impies assemblées.

I’ay veu apporter à quelque autre Prestre vn Calice, où estoit
le sang de Iesus-Christ, parce qu’il avoit consacré avant que venir
au Sabat. Luy le beau premier prend vn coûteau, & en donna vn
coup dedans, & le coûteau parust tout ensanglanté : Vn second en
fait autant, & les especes prirent la vraye couleur de sang Vn troisiéme
en fit de mesme, & le Calice devint tout plein de sang, qui
ruisseloit jusques à terre. Nôtre Seigneur se montra encore cette
sois accompagné de la Vierge & de deux autres Saints. Les Demons
vouloient s’enfuir, & il leur fit defense de desemparer.
Apres il reduisit les trois Prestres en cendre, & ils n’ont jamais
esté veus du depuis. On vid prendre le Calice à l’vn des Saints, &
l’autre recueillit le sang, & mesme la terre qui en étoit abreuvée.
Tout fut porté en haut, & les assistans furent tous dispersez par
vn coup de tonnerre. Si ces choses sont réelles, dequoy je laisse
le jugement aux autres, voila de grandes abominations, & quant
& quant de grands miracles ; & moy tant s’en faut que j’aye le
moindre doute de la presence réelle de Iesus-Christ au S. Sacrement,
à cause des insolens abus que les Diables & les hommes en
font dans ces lieux de desolation, qu’au contraire ma foy touchãt
cét article en est plus confirmée : car ce n’est qu’à raison de cette
presence que la Terre & l’Enfer joints ensemble en la fureur