Nostre lascheté les rend hardis, & s’ils mettent en pratique
cette detestable maxime, Si ius violandum est regnandi causa viclandum
est. Nostre condescendance fait vne bonne partie de leurs
crimes. S’ils n’auoient veû les peuples accoustumez à tout souffrir,
ils n’auroient eu garde d’exercer tant de cruautez, & les traiter
auec tant de violence. Qu’ils sçachent pourtant que pour estre
le fleau des peuples, ils n’amendent point leur chastiment ; Dieu
se sert des meschans pour chastier les bons, & estant appaisé par
l’amendement de ceux-cy, tourne son courroux contre les autres,
& comme vn Pere satisfait iette dans le feu les Verges dont il a
chastié ses enfans, ainsi Dieu apres qu’il aura souffert pour vn
temps le Regne des tyrans, destruira en vn moment, & eux &
leur tyrannie. Que si vous me dites comme les Impies & les
Athées, que le terme vaut l’argent. Que c’est vn à sçauoir si Dieu
fera cesser son chastiment sur le peuple, ou tournera sa vengeance
sur ceux qui l’escrasent & le destruisent. Ie vous responds que
comme cét Anglois repartit au François, qui luy demandoit en
raillant, quand est-ce qu’ils reuiendroient en France ; Nous repasserons
la mer, dit-il, quand vos pechez seront plus grands que
les nostres. De mesme ie dis que dés aussi tost que les crimes de
ceux qui gouuernent l’Estat seront paruenus au comble de leur
mesure, Dieu destruira leur grandeur. Que celuy qui a changé
la Monarchie en tyrannie, examine si ce n’est pas de luy que le
Prophete Esaye parle chap. 22. vers. 15. Quand Dieu dit par sa
bouche, qu’as-tu à faire icy, & qui est icy qui t’appartienne, que
tu t’es icy taillé vn sepulchre. Voicy l’Eternel te fera desloger
d’vn deslogement roide, & t’entortillera du tout, toy qui es l’ignominie
de la Maison de ton Seigneur, ie te ietteray hors de ton
rang, tellement qu’on te deboutera de ton estat, & vn autre sera
reuestu de ta casaque.

FIN.