C’est celuy que le Ciel auec soin enuironne,
Et qui sçait conseruer sa Royale Couronne.
Il est le premier Chef, de tout nostre bon-heur,
Seul qui a exilé loin de nous le malheur,
Et qui d’vn sainct amour va remplissant nos ames,
Eschauffant nos desirs aux ardeurs de ses flàmes.
Enfin ce beau Soleil Iuyt sur nostre Horison,
La campagne n’est plus son errante maison.
Il veut dedans Paris establir son Empire,
Vn monde tout entier apres ce bien souspire.
Courage, mon grand Roy, reuenez parmy nous,
Vous nous verrez ployer les genoüils deuant vous.
Ce Peuple qui cherit vne Royale enfance,
Proteste de flechir sous vostre obeyssance.
Sus, donc, ne tardez plus de nous venir reuoir,
Tout s’appreste icy pour vous mieux receuoir :
On vous fait vn bouquet de fleurs admirables,
Que l’Orient chez soy n’en trouue de semblables,
Les Roses & les Lys en seront l’ornement,
Et le gentil Oeillet l’aymé bigarrement :
On laisse le Soucy, auecque la Pensée,
De peur que vostre ame ne s’en trouue offencée ;
Le Girofflier, le Tim, & le verd Romarin,
La douce Marjoleine, & le Baulme terrain,
Auront lieu au Feston. Les rejettons d’Oranges,
Donneront de l’éclat à ces diuers meslanges,
Et toutes les odeurs que le Printemps produit,
Ne seront agencées que pour vostre deduit :
Bref, tout ce qui peut estre agreable à nos yeux,
Vous sera presenté en entrant dans ces lieux.