sont seruis, & au lieu de pauure & necessiteux que
vous estes, vous deuiendrez riche & opulent dans
peu de temps.

C’est ce qui m’a faict vous escrire ce mot d’auis, librement
& franchement, non point pour vn libelle
diffamatoire, ny pour vous courroucer & aigrir : Car
ie n’entens rien escrire sans la charité d’vn Chrestien,
& l’amour d’vn fidelle suiect, & qui ne soit veritable
& congneu de chacun & qui ne tende à vostre bien &
à l’aduancement de vostre grandeur.

Que s’il aduient par la permission de Dieu, que
vous n’en faciez vostre profit, & au liéu de donner
ordre à vos affaires, vous demeurez endurcy en vos
desordres & communes façons de faire, vsant du conseil
accoustumé, & voulant mal à moy & à tous ceux
qui vous donneront fidelle conseil & aduis, & vous
diront hardiment la verité, c’est lors qu’il faudra tenir
pour tout resolu, que Dieu vous a mis en sens reprouué,
& osté la cognoissance du bien qu’il vous faut
suyure & embrasser, pour vous precipiter dans le
gouffre de mil maux & d’infinis ennuis & miseres qui
ja vous menacent, & en bref vous accableront : & vn
argument infallible, que pour nos fautes & pechez
Dieu nous veut punir en son courroux, & auec vous
nous faire souffrir beaucoup d’affliction.

Et cela aduenant le sort sera ietté, il ne faut plus
attendre de voir en ce Royaume que meurtres, trahisons,
mutineries, seditions & rebellions contre
vous : chacun taschant de trouuer vn maistre plus sage,
plus iuste, plus amoureux du bien de ses subiects
que vous. Car il est certain que tout ainsi que
celuy qui est à son aise, redoute tousiours le remuement
& changement, de peur d’estre mal : Aussi est-il
indubitable que celuy qui est vexé & mal à son ayse,
ne demande que le remuement & changement :
D’autant que par ce moyen il peut recouurer quelque