à ressentir les outrages des curiositez de
leurs peuples.

Ie passe au peu de soin que les grands ont de
viure dans le respect de la Religiõ & ie dis que
ce mespris sacrilegue des choses saintes, est la
premiere cause du mespris que les peuples font
de se soumettre à leur obeisance, par la raison
plausible qu’ils ont que le pouuoir de Dieu estãt
plus souuerain sur les grands de la terre, que celuy
des grands sur les Peuples, il semble que les
grands dispensent les Peuples de leur obeïr, par
ce qu’ils se dispẽsent eux-mesmes de l’obeissance
qu’ils doiuent aux ordres de leur Souuerain.
Ce raisonnement est si veritable qu’on n’a iamais
presque veu de reuolte sous le regne des
Saincts, comme les méchans n’ont iamais regné
que dans les apprehensions criminelles d’estre
precipitez de leurs crimes par les iustes poursuites
de leurs peuples.

Faut-il maintenant prouuer que la profession
de la vertu n’est exercee qu’auec honte : & que la
pluspart du monde n’a de bonté qu’en apparence :
faut il faire voir qu’on n’est auiourd’hui honteux
que de n’estre point effronté : & qu’on ne
s’adonne Presque point à la vertu qu’a mauuais
dessein, c’est à dire pour faire plus heureusement
reüssir les souplesses sous le voile de la sincerité ;