l’honneur, & qu’il est mort ciuilement, il est incapable de
rendre ce don vtil au prochain : car qu’elle apparence qu’vn
homme infame occupe vn lieu d’honneur, paroisse en publique,
gouuerne vn Estat, il faut viure dans, vne bonne
renommée pour seruir au prochain, & pour rendre ce don
profitable, Sed vitam extendere factus hoc opus. Ce qui
vous fait voir qu’il n’y a rien au monde de plus cher que
l’honneur, & qu’vn homme qui l’a perdu est banny pour
iamais de la memoire des gens de bien, de la conuersation
des gens d’honneur, & rendu incapable de seruir le prochain.

Or supposé que Iule Mazarin ait esté homme d’honneur,
ie dis qu’il l’a perdu sans esperance de iamais le pouuoir
recouurir, parce que dés maintenant il est mort dans la
memoire des hommes de bien, & des iustes, parce qu’il
ne trouue en quelque lieu que ce soit aucun refuge qui luy
soit fauorable & propice, parce qu’il ne s’est iamais meslé
de seruir le prochain que pour le perdre, en s’establissant
sur ses ruines, s’il a perdu l’honneur il est mort ciuilement,
& partant i’ay [1 mot ill.] raison de vous presenter son tombeau qui
n’est autre que la médisance, Sepulchrum patens est guttur
eorum.

Premierement il est tres constant que l’honneur ne le fera
pas viure au delà dés temps, & qu’il est desia mort dans
la memoire des iustes, la raison c’est que pour estendre
l’honneur de son nom au delà de son tombeau, il faut posseder
la iustice, s’il est vray que celuy qui coupe vn arbre
par le pied, n’a pas enuie de manger de ses fruicts, s’il est
vray que celuy qui tarit vne fontaine dans sa source, n’a pas
dessein d’estancher sa soif dans son ruisseau, voyant que Iule
Mazarin en a tant voulu aux iustes, qu’il les a tous chassé
hors de France, qui dira qu’il a eu enuie de posseder la
iustice : c’est pourquoy il est desia mort dans la memoire
des iustes.