Anonyme [1652], LE TOVR BVRLESQVE DV DVC CHARLES. , françaisRéférence RIM : M0_3788. Cote locale : B_8_60.
Enfin il pique la mazette, Il s’en va le Duc Giroüette Sans auoir fait guerre ny Paix ; Mais il a bien fait pour iamais Vn Tour qu’il ne deuoit pas faire. Courage, enfans, c’est trop vous taire, Courez aprés ce Goguenard, Et criez tretous au Renard : Mais criez bien fort, ie vous prie, Du plus beau ton de raillerie. Ah ! le vilain qui se desdit, Il a chié dedans le lit, Il a chié dans nostre male : Ah ! le Normand comme il détale. Tu ne recouureras iamais Stenay, ny Clermont, ny Iamets.
Cela vaut mieux qu’vn grand outrage Pour le faire creuer de rage, Et i’espere qu’auant vn mois On luy verra manger ses doigts Pour auoir fait (ce miserable) Vne faute si déplorable : Mais il a beau se les manger, C’est ainsi qu’il nous faut vanger, Et c’est par cette penitence Qu’il faut punir son inconstance. Non, iamais il ne les aura, Qu’il gronde tant qu’il luy plaira.
Anonyme [1652], LE TOVR BVRLESQVE DV DVC CHARLES. , françaisRéférence RIM : M0_3788. Cote locale : B_8_60. |