ACTIONS DE GRACES DE TOVTE
la France à Monseigneur le Prince de Condé, touchant
son consentement à la Paix, FAIT PAR VN BOVRGUIGNON
MONSEIGNEVR
Parmy les rejouissances publiques de Paris
& de toute la France, sur l’heureux accomplissement
de la paix ; Ie ne m’estimerois fidelle françois
& principalement Bourguignon, si ie ne taschois
de tesmoigner en tout respect à vostre Altesse
l’obligation que ie luy ay auec toute la France d’auoir
consenti à ce bien public & de prendre part à sa
resiouissance. Ie luy suis obligé tres-estroictement
de ce qu’elle a fait ouurir tous les passages pour permettre
l’entrée des viures à Paris, veu que si ce mauuais
temps eut duré encore & que la charté du pain
eusse continué comme elle auoit commencé, i’aurois
esté contraint, ou de faire le demy crucifix, ou
de vendre le peu de hardes que i’auois, ou de m’en
retourner en mon pays auec des haillons sur le dos
la bagu ette à la main, & la crainte perpetuelle
-- 4 --
d’estre arresté par vos gens de guerre. C’estoit desia
la resolutiõ que i’estois aux termes de prendre quãd
les trefues & suspensions d’armes commencerent &
comme ie vis quelque apparence de bon-heur, i’aymay
mieux viure vn peu plus doucement, & voir
la suitte des affaires, que de m’en retourner en crainte
d’estre mal traitté & plein de deplaisir de ne m’estre
pas rencontré a l’agreable & heureuse nouuelle
de la paix.
Mais Monseigneur toute la France vous est infiniment
obligée, de ce qu’il semble que vous posiez
les armes que vous auiez prises contre Paris, &
qu’oubliant tout ce qui s’est passé, vous repreniez
vostre ancienne douceur, & vous voulez luy procurer
par la paix sa premiere abondance, & iose asseurer
V. A. Que l’action qu’elle vient de faire sur
passe eminemment toutes les autres qu’elles auoit
faictes auparauant, puis que si toute sa vie à esté vn
miroir de combats & de victoires, cette action icy
est vn miroir de douceur & de clemence, & si dans
toutes les autres elle n’a fait que vaincre, dans cellecy,
elle à appris à se vaincre elle mesme qui est la
plus genereuse, la plus glorieuse, & la plus remarquable
action qu’elle pouroit faire. Ouy Monseigneur,
l’action que vous venez de faire outre qu’elle
surpasse toutes les autres, elle sert à toutes les autres
de couronnement & de gloire, & si vos glorieuses
années, ont esté autant de trauaux, vos trauaux
-- 5 --
autant de combats, & vos combats autant de
victoires, ne falloit-il pas couronner le tout, par
vne glorieuse cognoissance de vous mesme auec
vne victoire remportée sur vos passions.
Que vous auez bien obserué ce beau Precepte,
Omnia si vis noscere te ipsum noscere discas
Omnia si vis vincere te ipsum vincere discas.
Puis que ayant trauaillé si soigneusement toute
vostre vie à cognoistre non seulement toutes les
sciences, maistous les hommes ; il ne vous restoit
plus qu’à vous cognoistre vous mesme, comme
apres n’auoir fait autre chose que de vaincre, veu
qu’il n’est personne qui ne sçache les combats que
vous auez donnez, les victoires que vous auez remportées,
les villes que vous auez prises & les prisonniairs
de guerre que vous auez faits, il ne vous restoit
plus, Monseigneur, qu’à vous vaincre vous
mesme, dans vne action où il sembloit que vous
vouliez ternir toute vostre gloire. Ie ne puis vous
le celer & auec tout le respect que ie dois à vostre,
A. ie luy demande tres-humble pardon, si ie luy dis
que l’employ qu’elle auoit voulu prendre estoit en
quelque façon iniuste, puis qu’il n’estoit pas non
seulement contre Paris, mais qu’il sembloit choquer
l’interest de toute la France. Ie veux croire
pourtant qu’elle auoit de iustes raisons pour cela.
[1 lettre ill.]ont ie n’auray iamais la temerité de rechercher
[1 mot ill.] causes, mais Monseigneur, encore estoit-il vn
-- 6 --
peu necessaire que V. A. fit paroistre aux desinterressez
ses sentimens dans cette rencontre.
Comme la naissance des Princes surpasse le commun
des hommes par la grandeur, de mesme leurs
actions doiuent estre grandes surpasser celles du
commun, estre veus de tout le monde. Vostre
naissance, Monseigneur, est cognue à toute la terre,
& il n’est personne qui ne sçache que vous estes
de cette Illustre race des Bourbons, Illustre par
tant de voix, illustres par tant de Princes, & illustre
par tant de conquerans, dont vostre Altesse herite
si dignement des vertus & de noblesse. Toutes vos
actions Monseigneur ont esté grandes & vous n’auez
fait depuis vostre berceau que des actions de
Prince & d’vn Prince de vostre naissance ; elles ont
surpassé celles du commun, puis que il n’y a eu
qu’vn seul Alexandre qui ait peu faire ce que vous
faites, & encore semblez vous le surpasser & vous
le surpassez effectiuement, puis qu’il estoit encore
sujet à quelque vice, & que vous vous ne vous plaisez
que dans la practique des vertus Mais encore,
Monseigneur toutes vos actions ont esté veuës de
tout le monde comme la maistresse de l’air les a
portées par toute la terre, & vous deuez esperer
qu’elle n’en fera pas moins de celles qui effacera
les mauuais sentimens qu’on commançoit de prendre,
du dessein que vous auiez, elle publira par tout
qu’àpres auoir cogneu tout & vaincu les ennemis
-- 7 --
de la France, vous vous estes par vn genereux mouuement,
cogneu & vaincu vous mesme, & ie diray
auec tous les hommes qu’obseruant ce beau prouerbe.
Maxima laus est noscere se ipsum
Vincere seipsum maxima virtus.
Vous auez adiousté le comble de gloire à vos actions,
& que vous comprenez seul eminemment
ce que mille autres possedent auec auantage. Ce
sont les veritables sentimens de celuy qui veut passionnement
viure & mourir,
MONSEIGNEVR
Le tres-humble & tres-obeissant seruiteur
-- 8 --