LE FESTIN BVRLESQVE, OV
la Micaresme des Partisans traittez à la Cour, par
leur chef & protecteur le C. M.

CE fatal ennemy de l’Estat, mais cher amy &
confident de la caballe Partisanne le C. M. pour
consoler & rejouyr cette fourbe affligee, du
mauuais succes de leurs affaires, & peu d’espoir
qu’ils ont de releuer le monopole renuersé, & aussi
pour tascher de dissiper de son esprit les brouillars
de la crainte que luy cause la prudente affection que
nostre Parlement au bien de l’Estat, la valeur de nos
Princes, & le zele de tous les peuples au seruice du Roy,
estant magnifique comme il est : sur tout en momeries,
ieux, balets & festins, pourueu qu’ils luy coustent aussi
peu que la superbe & enchanteuse Comedie d’Orphee ;
qui luy fit produire aux yeux de la Cour des Seraines
apriuoisees de sa main, & faites a son vsage, des Tritons
Hongres & Poissons d’Avril, & autres monstres
venus d’Italie à si grands frais, (bien que pour le diuertissemens
d’vne nuict) que la France en doit sentir l’incommodité
plusieurs annees ; puis que la leuee des deniers
pour la paye de nos armees seruoit de fonds à cette
fanfare & paya la peine de l’inuenteur, bien qu’elle fut
non seulement invtile : mais honteuse & dommageable
à cause de la misere du temps, le bouffon d’Estat,
dis ie, c’est aduisé de traitter à cette mycaresme sa troupe
volante & les iniustes de ses rapines : & pour faire voir

-- 3 --

que rien ne lui est impossible, apres l’enchantement des
principaux Genies de la France, qu’il retient soubmis
à sa deuotion partie de l’Estat. Il a fait par ses charmes
que les quatre parties du monde, les Elemens, & mesme
les Enfers ont fourny à ce qu’il a desiré pour la somptuosité,
abondance & rareté de ce festin, dont il a bien
voulu que Paris eust la Relation pour luy donner sujet
de craindre autant que d’admirer sa puissance, la voicy
Lecteur, telle qu’elle ma esté donnee : mais pour ne te
laisser pas surprendre à l’estonnement, i’ayme mieux
que tu croie que c’est vn mensonge de mon inuention,
pour donner quelque moment de diuertissement à son
esprit ennuyé de la longueur des miseres de nostre chere
Patrie.

 

Premier seruice.

A l’abord, la table fut couuerte de six bisques d’Elephans,
six autres de cocodrilles seruis en bassins de fõtaine,
huit douzaines de herissons en salmigondis, deux
mille rats de Brazil en galimafree, deux mille cameleõs
en capirotades, douze hures de Lyons en forme de teste
de veau, cent pieds d’helan, & quatre douzaine de langue
de centaure en forme de pieds & langue de moutõ :
Mais au millieu, Il fut posé vn monstre Amphibre au
court bouillon, nõme hypogriphe en harnaché de beatilles
d’E dits, de traitez, de remises, de subuentions &
suplemens de haut goust, il estoit timbré d’vne bougette
à plusieurs boursons, & portoit autour du col grãd
nombre d’Escussons ou plustost escarcelles, representãt
les armes de Messieurs les conuiez, ses griffes semblent
estre incessamment occupees à ramasser autour de soy
grand nombre de differentes pieces d’or & d’argent

-- 4 --

qui estoient mises, & separees chacunes en leurs appartenances
dans ces bougettes : mais ce qui fit émerueiller
les assistans, c’est de voir que ce mõstre portoit le visage
de chacun d’eux en particulier, & que dans l’entretien
quelqu’vn de la compagnie ayant prononcé le nom de
Parlement, le fantosme disparut à l’instant, ce qui fit
auancer le second seruice.

 

Second seruice.

Il fut serui Soixante dromadaires bardez en chapons
du Mans, trente mulets d’Auuergne farcies de grenoüilles
& lardez de nerfs de bœuf.

Cinquante Reinocerots rotis en guise de cochons
de laict.

Douze porcs épics auec leur peau & leurs soye en guise
de lardons.

Quinze licornes lardees de viperes auec leur bois y
passerent en dindons.

Soixante leopards en accolade de lapins de garenne,
soixante quatre boucs à la Napolitaine.

Troisiesme seruice.

Quatorze cens hiboux & chatshuans en plume pour
faisans Soixante mil douzaine de limassons en broche
pour allouettes. Douze mil douzaines de chauuesouris
grasse pour ortolans. Six vingt renards à la vinaigrette.
Mille corbeaux en fricassee de poulets, & six
douxaine de dragons volans à la dodine. Douze salemandres
à la sauce à Robert.

Quatriesme seruice.

Douze cens oyseaux de proye de toutes sortes pour
perdrix, beccasses & gelinottes. Cinquante griffons
lardez de serpens d’Affrique, ayant tous figure de soutraitaus.

-- 5 --

Trente douzaines harpes à visage de maltautiers
couuers de chacun à la grimouche. Il fut mis au
milieu de la table vn puissant antrepophage chargé de
lauriers, qui seruit seulement de spectacle personne ny
ayant osé toucher.

 

Cinquiesme seruice de paticerie.

Douze balaines en venaison. Mille douzaines de coquesigruës
en tous les deux cens cinquante blereaux.
Six cens douzaines de Pigmees qui sortoient tous viuans
de leur paste, & sur la platte forme furent long
temps figures & postures recreatiues, cependant que
l’vn d’eux iouoit du flageollet, & apres retournerent
en leur domicile apres auoir nazardé ces messaure d’assez
bonne grace.

Sixiesme seruice.

Cent douzaine ; d’œufs d’Autriche à la huguenotte
& à la Portugaise. Soixante tortue du Nil d’effroyable
grondeur, dont les écailles furent presentees à ces
Messieurs, pour faire des Imperialles à leurs carrosses,
auec des cloux d’or à leur entrée à Paris.

Dix milliers de sangsuës des Palus meotides au saupiquet,
portant figure humaine comme les conuiez.

Issues, Ragouts & entremets.

Soixante douzaines de nerfs de bœuf fumez pour
langues.

Cinq mille testicules d’Enuques à la sauce blanche enuoyez
par le Grand Seigneur à son Eminence, en reconnoissance
de la contenuatiõ de la guerre en la Chrestienté,
dont il a profité sur l’Estat de Venize.

Cinq mille douzaines de cigalles du Iappon pour
anchoies.

Six charettes de sauterelles d’Egypte & hannetons
du Perrou en fricassee.

-- 6 --

Quantité de jambons d’hypsientaures en forme de
jambons de Mayence.

Pour Salades.

Douze milles esponges remplies d’or potable prestes
d’estre pressée, qui fit songer à soy vn chacun des assistãs.

Trois cens charettes de noix de Galles confites en vinaigre.

Quatre vingts plats de chardons de l’Arabie piece
heureuse.

Autant de lignes d’orties & prunelles de canadas pour
oliues.

Il fut serui au milieu de ces plats vn grand bassin de
salade de Gascongne, ce qui fit vn peu murmurer le
Partisan comme vn mets de mauuais presage, ce qu’estant
à present, il fut osté & gardé pour vne autre fois.

Pour le dessert.

Six vingt douzaines de citroüilles de la terre de Promission.

Soixante & douze bassis de gratte culs du Iappon.

Quatre vingts plats de poires d’angoisses & d’estrangle
vilain.

Six charettes de pommes d’enfer.

Soixante hottées de glands de l’Arabie deserte & douze
charettees d’artichaux sauuages :

A cet incomparable festin il fut seruy au bufet soixante
douzaines de bouteilles de ginguet muscat de Normique.

Deux mille flacons de vin prunellé de la nouuelle
Espagne.

Maluoisie de cornes vertes autant.

Et quatre mille bouteilles de ius de fumier à lambre de

-- 7 --

la mer noire.

 

Le desert leué on vit paroistre dessus la table & deuãt
chacun de ces Messieurs vne seraine nuë chacune sa corne
d’abondance en main, representant le visage au naturel
des belles qui sont honorées de leur entretien à
Paris, qui ietterent à chacun de leurs galands des eaux
& poudres de senteurs, & chanterent des vandeuilles
pour obtenir deux augmentations de leur pension d’amour,
nouueaux carrosses & emmeublements à leur
retour à Paris.

Ces Dames disparuës l’on seruit la nape dans vn bassin
à lauer vn grand nombre de testes humaines dont le
spectacle deuoit faire horreur : mais ces Messieurs y trouuerent
de la consolation, voyant que s’estoient celles
de leurs ennemis & sur le doute qu’elles fussent naturelles,
quelques vns y porterent les mains qui les firent
estodnez, car ces testes se trouuerent auoir des dents
qui mordirent douloureusement ces curieux, en sorte
qu’ils s’en sentirent long-temps, & pour le tout disparut
laissant de la peur & de la confusiõ en l’ame de tous.

Et d’autant qu’apres vn si grand repas ils deuoient
auoir besoin de poudre digestiue, il en fut serui dans
vne boëte d’or vermeil, elle estoit composée de cendre
de tonnerre de la poussiere que fait le mouuement du
Zodiaque, & des essieux sur quoy roullent les deux polles
faite durant l’esté, auec vn peu de la suye qu’engendre
le feu elementaire au ciel de la lune son voisin, dont
chacun de ces Messieurs les Partisans prit vne cueilliere
pleine par curiosité que par necessité, pensant auoir
tous l’estomach du mesme aussi chaud que l’Autruche
ayant tant digeré d’or & d’argent depuis que le monopole

-- 8 --

les employe : mais on trauaille à Paris à faire vn
vomitif compost d’Arrest de Parlement qui leur fera
voir qu’il est indigeste en leur faisant rendre tout : Ce
festin tout a fait acheué ce grand Cardinal ou plustost
Archifourbe, pour leur tesmoigner sa science à la magie,
& asseurer leurs esprits par d’autres prodiges plus
recreatifs que les precedens, s’estant saisi d’vne verge
enchantée il commanda en frappant quelques personnages
representez dans vne tapisserie de desccendre
pour donner la Musique à la compagnie, au defaut de
celle de la chambre du Roy demeurée icy, tellement
que tout aussi-tost on vit Teresias se saisir d’vne vieille,
pelipheme d’vne fleuste à trois trous & d’vn petit tabourin,
Annibal de Carthage des cymballes, Geofroy
à la grand dent d’vne vessie de porc au bruict d’vn bassin,
& Meluzine d’vn tambour de basque, ils firent
merueille auec ces instrumens y ayant ioint leurs voix
pour chanter vne Hymne à la loüange de la Maltoute
& de ses enfans, & sur l’esperance de la voir vn iour refleurir
apres les pretenduës funerailles du Parlement &
des Bourgeois de Paris, mais qui fut trouué admirable
c’est que l’asne d’Apulee ayant esté appellé à son tour
quitta la tapisserie pour venir battre la mesure auec sa
verge naturelle, tantost sur l’espaule de l’vn tantost sur
l’espaule de l’autre, ce qui fit vn peu rire l’assistance toutefois
du bout des denis, se souuenant tousiours des
circonstances de ce festin, ou parmy la rare somptuosité
ils auoient remarqué la malice de celuy qui les traittoit,
qui s’estoit joüé d’eux en leur imprimant la crainte
du sort qu’ils attendoient, dont il ne sera pas exempt
luy-mesme si ou luy fait Iustice.