LA FVITTE
DES
MALTOTIERS
APRES
MAZARIN.

Par le Sieur POMPHOLLIS.

 

DEPVIS que vous estes sortis,
Messire Iulles hors de Paris,
L’on a bien taillé des croupieres
A Messieurs vos Secretaires,
Qui ont aussi pesché au plat,
Et qui n’ont sçeu vostre depart.
L’on en voyoit dans cette ville
Plus de cent, voire plus de mille
Qui se vouloient aussi sauuer,
Afin de vous aller trouuer.
Voyant qu’on mettoit icy ordre,
Et qu’ils ne sçauoient plus où mordre,
Les vns couroient parmy la ruë,
Qui d’vne façon mal-autruë,
Se disoient Seigneurs d’vn village,

-- 2 --

Et qu’on leur donnast le passage :
Les autres grands Monopoleurs,
Noircis comme des Ramoneurs,
Vestus d’habits de gueuserie,
Pour tascher de sauuer leur vie :
D’autres retournoient leurs habis
Pour sortir deuers Sainct Denis,
Et par la porte de Sainct Iacques
Il en est sorty sans casaques,
Qui se disoient mourir de faim,
Et qu’ils alloient chercher du pain,
C’est vous qu’ils suiuoient à la piste
Comme petits Mazarinistes :
Mais tous les gros sont demeurez,
Qui souffrent autant que les damnez,
On les a fait rougir de honte
Quant on leur a demandé conte
Des Louys qu’ils ont pris pour vous.
Ie trouue qu’ils estoient bien fous,
De mettre tout leur esperance
A vostre trompeuse Eminence :
Ils en sont bien aux repentans,
D’auoir passé tant de comptans ;
Dont l’vn d’eux qui n’estoit pas sot
S’est retiré tout aussi tôt,
Qu’il a veu que vostre Eminence
Commençoit n’estre en assurence.
Ie crois que vous auez regret
De ce beau Palais imparfait,

-- 3 --

Et cette grand Bibliotheque,
Tomes de Grenade & Seneque,
Et autres beaux liures Romains,
Qu’on ne vous rendra pas és mains.
Reuenant à vostre caballe,
Qui tousiours appreste leur malle,
Attendant que leur enuoyez
Ces machines des autres annez,
Où ils mettront leur equipage,
Et leur honneste personnage.
Ils prendront les cordes du bal
Qui sont au Palais Cardinal,
Pour estre enleuez hors de France
Où se plaira vostre Eminence.
Ils sortiront sans passeport,
Ny sans parler ny dire mot,
Pourueu que les cordes soient fortes
Pour seulement sortir les portes ;
Et vous commanderez tout haut
Que l’on vous enleue bien haut
A la grand’troupe diabolique
Auec leurs violons & musique,
Estant conduits par Belzebut
Les feront arriuer au but,
En Enfer tousiours en souffrance
Au desir de toute la France.

 

A PARIS,

M. DC. XLIX.

-- 4 --