EXTRAICT DES REGISTRES
de Parlement.

CE IOVR, la Cour toutes les
Chambres assemblées, ayant
deliberé sur l’execution des
Arrests d’icelle, des sept,
neuf & vingtiesme Feurier
dernier, & deuxiesme de ce mois & an,
concernant le Cardinal Mazarin ; Et oüy
sur ce les Gens du Roy, A ARRESTÉ &
ordonné, Que lesdits Arrests seront executez,
& suiuant iceux, à la Requeste & diligence
du Procureur General, incessamment
informé contre ledit Cardinal
Mazarin, ses Parens & Domestiques, des
Contrauentions par eux faites à l’execution
desdits Arrests ; Ensemble de la Depredation
faite par ledit Cardinal, ou

-- 4 --

par ses ordres, sur les Vaisseaux Estrangers,
Dissipation des Finances, Transport
des deniers hors le Royaume, Empeschement
à la Paix, & Mauuaises impressions
par luy données au Roy, circonstances
& dependances ; Et contre ceux qui l’ont
suiuy, assisté & retiré, & qui ont eu commerce
& correspondance par lettres & autreinent,
auec ledit Cardinal, depuis & au
prejudice de la publication dudit Arrest
du neuviéme Feurier : A cette fin a commis
& commet, outre les deux Conseillers
commis par l’Arrest du deuziesme de ce
mois, Maistres François Bitault & Pierre
Pithou, Conseillers en ladite Cour, pour
proceder au fait de ladite Information, lesquels
se transporteront en la Ville de Dourlans,
& par tout ailleurs où besoin sera. Ordonne
en outre, que où ledit Cardinal sera
trouué en France, ou és Places & chasteaux
de l’obeissance & protection du Roy, de se
saisir de sa personne, & l’amener prisonnier
en la Conciergerie du Palais, pour estre

-- 5 --

contre luy procedé extraordinairement.
Enjoint à tous Gouuerneurs, Officiers &
Subjets du Roy, tenir la main à l’execution
du present Arrest. Ordonne aussi
qu’à la Requeste dudit Procureur General,
tous les Biens dudit Cardinal & reuenus
de ses Benefices seront saisis. A cette
fin aura, Commission pour compulser
tous Registres de Banquiers & personnes
publiques : Et luy sera deliuré toutes
lettres monitoires en forme de droict. Enjoint
aussi à toutes personnes qui ont cognoissance
desdits Biens, ou qui en ont, de
le declarer, à peine de punition. Et sera
le present Arrest, affiché, leu & publié
à son de Trompe & cry publicq, par
tous les Carre fours de cette Ville & Faux.
bourgs, Et enuoyé aux Bailliages, Seneschaussées
& Sieges du ressort, pour y
estre leu, publié & executé à la requeste
du Procureur General, & diligence de ses
Substituts. Et en sera donné aduis aux
autres Parlemens, qui seront conuiez de
donner pareil Arrest. FAIT en Parlement

-- 6 --

le vnziesme Mars mil six cens cinquante-vn.
Signé, GVYET.

 

LE Lundy 13. iour de Mars 1651.
l’Arrest cy-dessus de Nosseigneurs de
la Cour de Parlement, a esté leu, publié &
affiché és Carrefours ordinaires & extraordinaires
de cette Ville & Faux-bourgs de
Paris, Par moy Charles Canto, Juré Crieur
ordinaire du Roy, en la Ville Preuosté &
Vicomté de Paris. Faisant laquelle publication,
i’estois accompagné de quatre Trompettes,
Jean du Bos, Iacques le Frain, Iurez
Tompettes du Roy esdits lieux, & deux
autres Trompettes commis.

Signé, CANTO.

Collationné à l’original par moy Conseiller
Secretaire du Roy & de ses Finances.