EXTRAICT DES REGISTRES
de Parlement.

CE iour la Cour, toutes les Chambres
assemblées, Monsieur le Duc d’Orleans
Oncle du Roy, & le sieur Prince
de Condé y estans, lecture faite de
l’Arrest du 29. Decembre dernier, donné contre
le Cardinal Mazarin ; Et ouy sur ce Beschefert,
Substitut pour le Procureur general du Roy, luy
retiré, la matiere mise en deliberation : LADITE
COVR executant ledit Arrest, & autres donnez
en consequence, a ordonné & ordonne, qu’il sera
incessamment procedé à la vente de ce qui reste
des meubles, & autres choses appartenant audit
Cardinal ; & à la reddition des comptes des Fermiers
& Receueurs des reuenus de ses Benefices,
en presence de Maistres Clement le Meusnier,
Iacques Renard, Paul Portail, Charles Brisart,
Alexandre Perau & Pierre Pithou, Conseillers en
ladite Cour, ou de deux d’entr’eux, en l’absence
ou maladie des autres ; & ce qui sera par eux fait
& ordonné, executé, nonobstant oppositions &
appellations faites & à faire, & sans preiudice d’icelles :
Ordonne en outre qu’il sera par deux
Bourgeois de chacun quartier, qui seront nommez
en l’Assemblée de l’Hostel de Ville, fait

-- 4 --

incessamment vne leuée de deniers sur le pied
d’vne année de ce qui se paye pour la taxe des
Bouës sur chacun des Locataires, & habitans les
Maisons de cette Ville & Fauxbourgs de Paris, au
payement de laquelle chacun particulier, qui a
accoustumé de payer ladite taxe des Bouës, sera
contraint au premier refus, nonobstant oppositions
& appellations faites & à faire ; lesquels deniers,
& ceux qui prouiendront de la vente des
meubles & reuenus des Benefices dudit Cardinal,
ensemble ceux estans entre les mains de
Maistre Martinet, procedans de la
vente de la Bibliotheque d’iceluy Cardinal, iusqu’à
la somme de cent cinquante mille liures,
seront mis entre les mains des Banquiers, pour
les faire deliurer en tous lieux à celuy ou ceux
qui executeront ledit Arrest du vingt-neufiesme
Decembre dernier ; Et sera le present Arrest leu,
publié & affiché en tous les Carrefours de cette
Ville & Fauxbourgs. FAIT en Parlement le 24.
Iuillet, mil six cens cinquante-deux.

 

Signé, DV TILLET.

Collationné à l’Original par moy Conseiller, Secretaire
du Roy, Maison, Couronne de France, & de ses
Finances.