EXTRAICT DES REGISTRES
de Parlement.
CE iour la Cour, toutes les Chambres
assemblées ; Sur l’aduis qu’en
haine de l’Arrest de ladite Cour,
rendu le huictiéme de ce mois &
an : Le Cardinal Mazarin, pour
exercer sa vengeance contre ladite Cour & cette
Ville de Paris, fait aduancer toutes les trouppes qui
estoient sur la frontiere, mesmes celles qui estoient
en garnison dans les places les plus importantes,
& tiré le Canon des Citadelles des Villes frontieres,
& expose par ce moyen toutes les Villes
aux ennemis & le Royaume en proye, A ORDONNÉ
ET ORDONNE, que ledit Arrest sera
executé, A fait & fait inhibitions & defenses à
tous Capitaines & Soldats d’aprocher à vingt lieuës
prés de cettedite Ville de Paris. Enjoint à ceux
qui sont plus aduancez de se retirer incessamment
dans les garnisons des Villes frontieres, &
faute de ce, permet & enjoint aux Habitans des
Villes, Bourgs & Communes de s’armer & leur
courir sus, à cette fin sonner le tocsin. Fait aussi
-- 4 --
defenses à toutes personnes de les retirer & leur
fournir aucuns viures & munitions, & à tous
Capitaines & Gouuerneurs de laisser sortir aucunes
garnisons, canons & munitions, à peine
contre tous les contreuenans de confiscation de
corps & biens. Et sera le present Arrest leu, publié
& affiché par tous les carrefours de cette Ville &
& Fauxbourgs de Paris, & enuoyé aux autres Villes,
Bourgs & Villages, pour y estre pareillement
publié & affiché à la diligence du Procureur general.
FAIT en Parlement le dixiéme Ianvier mil six
cens quarante-neuf. Signé, DV TILLET.
Collationné à l’original par moy Conseiller
Secretaire du Roy & de ses Finances.
LE Lundy vnziéme iour de Ianuier mil six cens quarante-neuf,
l’Arrest cy-dessus de Nosseigneurs de la Cour de
Parlement, a esté leu & publié à son de Trompe & Cry public,
tant és Portes & Entrées de cette Ville & Fauxbourgs
de Paris, qu’aux Carrefours & Places publiques de cettedite
Ville & Fauxbourgs, par moy Iean Iossier, Iuré Crieur
ordinaire du Roy en la Ville, Preuosté & Vicomté de Paris,
accompagné de Didier Ordin, dit Champagne, Iean du Bos,
& Iacques le Frain, Iurez Trompettes du Roy, & affiché où
besoin a esté. Signé, IOSSIER.