EXTRAICT DES
REGISTRES
DE PARLEMENT

CE iour la Cour toutes les Chambres
assemblées, sur l’aduis qu’en haine de
l’Arrest de ladite Cour, rendu le huictiéme
de ce mois & an ; Le Cardinal
Mazarin, pour exercer sa vengeance contre ladite
Cour & ceste ville de Paris, fait auancer toutes les
troupes qui estoient sur la frontiere, mesme celles
qui estoient en garnison dans les places les plus
importantes, & tire le canon des Citadelles des
villes frontieres ; & expose par ce moyen toutes
les villes aux ennemis, & le Royaume en proye ;
A ORDONNÉ ET ORDONNE, que ledit Arrest sera
executé, fait inhibitions & deffenses à tous Capitaines
& soldats, d’approcher à vingt lieuës de
ceste ville de Paris : Enioint à ceux qui sont plus auancez,
de se retirer dans les garnisons des villes
frontieres ; à faute de ce, permet & enioint aux habitans
des villes, bourgs & cõmunes, de s’armer &

-- 4 --

leur courit sus, à ceste fin sonner le tocsin. Fait aussi
defenses à toutes personnes de les retirer & leur
fournir aucuns viures & munitiõs ; Et à tous Capitaines
& Gouuerneurs de laisser sortir aucunes garnisons,
canons & munitions, à peine cõtre tous les
contreuenans de confiscation de corps & biens :
Et sera le present Arrest, leu, publié & affiché par
tous les carrefours de ceste ville, & faux-bourgs
de Paris, & enuoyé aux autres villes, bourgs & villages,
pour y estre pareillement publié & affiché
à la diligence du Procureur General. FAIT en Parlement
le dixiéme Ianuier, mil six cens quarante-neuf.

 

Signé, DV TILLET.

Collationné à l’Original, par moy
Conseiller Secretaire du Roy &
de ses Finances.

Le Lundy dixiéme iour de Ianuier mil six cens quarente-neuf,
l’Arrest cy-dessus de Nosseigneurs de la
Cour de Parlement, a esté leu & publié à son de Trompe
& Cry public, tant és Portes & entrées de cette Ville &
Faux bourgs de Paris, qu’aux Carrefours & Places publiques
de cette dite Ville & Faux-bourgs, par moy Iean
Iossier, Iuré Crieur ordinaire du Roy en la Ville, Preuosté
& Vicomté de Paris, accompagné de Didier Ordin, dit
Champagne, Iean du Bos, & de Iacques le Frain, Iurez
Trompettes du Roy, & affiché où besoin a esté.

Signé, IOSSIER.