EXTRAICT DES REGISTRES
de Parlement.
CE IOVR, la Cour toutes les Chambres
assemblées, Sur l’aduis qu’en haine de
l’Arrest de ladite Cour, rendu le huictiéme
de ce mois & an, le Cardinal Mazarin,
pour exercer sa vengeance contre ladite Cour
& cette Ville de Paris, fait auancer toutes les troupes
qui estoient sur la frontiere, mesme celles qui
estoient en garnison dans les Places les plus importantes,
& tire le canon des Citadelles des Villes
frontieres, & expose par ce moyen toutes les
Villes aux Ennemis, & le Royaume en proye, A
ORDONNÉ ET ORDONNE, que ledit Arrest
sera executé, A fait & fait inhibitions & defenses
à tous Capitaines & Soldats d’approcher à vingt
lieües prés de cettedite Ville de Paris ; Enjoint à
ceux qui sont plus aduancez, de se retirer incessamment
dans les garnisons des Villes frontieres : Et à
faute de ce, permet & enjoint aux Habitans des Villes,
Bourgs & Communes, de s’armer & leur courir
sus, à cette fin sonner le tocsin. Fait aussi defenses à
toutes personnes de les retirer, & leur fournir aucuns
viures & munitions, Et à tous Capitaines &
-- 4 --
Gouuerneurs, de laisser sortir aucunes garnisons,
canons & munitions, à peine contre tous les contreuenans
de confiscation de corps & biens. Et sera le
present Arrest leu, publié & affiché par tous les
carrefours de cette Ville & Faux-bourgs de Paris, &
enuoyé aux autres Villes, Bourgs & Villages, pour
y estre pareillement publié & affiché à la diligence
du Procureur General. FAICT en Parlement le
dixiéme Ianuier 1649. Signé, DV TILLET.
Collationné à l’original par moy Conseiller Secretaire
du Roy & de ses Finances.
LE Lundy vnziéme iour de Ianuier mil six cens quarente
neuf, l’Arrest cy-dessus de Nosseigneurs de la
Cour de Parlement, a esté leu & publié à son de Trompe
& cry public, tant és Portes & entrées de cette Ville &
Faux-bourgs de Paris, qu’aux Carrefours & Places publiques
de cette dite Ville & Faux-bourgs, par moy Iean
Iossier, Iuré Crieur ordinaire du Roy en la Ville, Preuosté
& Vicomté de Paris, accompagné de Didier Ordin, dit
Champagne, Iean du Bos, & de Iacques le Frin, Iurez
Trompettes du Roy, & affiché où besoin a esté.
Signé, IOSSIER.