LA MAGNIFIQVE ENTREE
DE LA PAIX,
OV
LES SVPERBES PORTIQVES ET ARCS
de Triomphe, preparez à la venuë de leurs
Majestez dans la ville de Paris.

C’est de tout temps que l’on à fait cette remarque,
que la Prouidence diuine fait éclater ses merueilles,
lors que l’on a le moins de subiet de les esperer,
& que l’apparence des affaires semble prendre
vn chemin tout a fait esloigné des remedes necessaires
en ces extremitez ; nous auons tant d’exemples de cette verité,
que ce seroit faire vn crime irremisible, de ce défier du
secours de cette Bonté souueraine, quand mesme nos miseres
seroient au dernier periode, & quelles sembleroient incapables
de receuoir quelque soulagement.

Cette Paix inesperée nous la confirme tout à fait, & n’en
peut laisser aucun doute que dans les Esprits incredules,
estant venuë dans vn temps où tout sembloit conspirer à la
destruire. En effet, qui n’eut dit voyant qu’il y auoit tant de
personnes à satisfaire, dont les interests estoient de si difficile
accommodement, aigris de plus par des sentimens passionnez,
& ne manquent ny de moyens ny de puissance
pour venir à bout de leurs desseins ; qui n’eut iugé, dis-je,
qu’vne longue guerre ciuile estoit le seul moyen de decider
ces intrigues embarassés. Et le coutelas fatal qui deuoit
coupper le nœud Gordien, comme impossible à desnoüer,
cependant lors que les gens de bien comme lassez d’importuner
le Ciel de leurs vœux, s’estoient desia resolus à subir
les fleaux de la Iustice diuine, vn miraculeux rayon a percé
les tenebres de nos troubles, & nous auons veu ce visage

-- 4 --

riant de la Paix auec autant de joye & de rauissement, que
les Mariniers qui voyent le iour apres vne tempeste furieuse,
dont les moindres effets estoient des signes asseurez de leur
naufrage.

 

C’est pour cette raison que la France toute rauie d’allegresse
rend des graces infinies au Tout-puissant de cette faueur
miraculeuse, & prepare des entrées à l’arriuée de cette
fille du Ciel : Et que Paris la Reine de ses Villes & la Capitale
du Monde, employe toute son industrie & sa magnificence
pour luy dresser des Arcs de triomphe dans ses places
principales, accompagnez de concerts armonieux sur le
sujet de ses loüanges, pour accompagner la reception & les
acclamations de tout son peuple.

Mais comme il y en aura beaucoup qui pour estre esloignez
de ce sejour, ne pourront pas iouyr de la veuë de tant
de merueilles, i’ay trouué tres-à propos d’en faire vn crayon
racourcy, & d’en charger la renommée pour la publier par
tous les climats de la terre.

Voicy donc à peu prés le dessein du pompeux appareil, que
Paris a destiné à l’aduenement de cette Nimphe en la compagnie
de leurs Majestez.

A l’entrée du Pont de Neuilly il y doit auoir vn Portique
d’ordre Toscan auec assez peu d’ornement, au dessus duquel
sous le tympan il y aura vn bas relief, où l’on verra representez
quelques peuples de la Campagne, comme ruinez de la
guerre, qui dresseront les mains & les yeux vers le Ciel auec
cette deuise : Da pacem Domine in diebus nostris, vn Dieu sera
dans le Ciel qui fera descendre la Paix dont il fera present à
ces peuples, auec ces mots, Pacem meam do vobis.

Seigneur
donnez-nous
la
Paix en
nos iours.

Ie vous
donne ma
Paix.

Au Roule proche des Faux-bourgs il y aura comme vn vestibule
d’ordre Dorique, du plafond duquel fait en façon de
nuée, sortira l’Ange qui annoncera aux Pasteurs la Naissance
de Iesus auec vne banderolle, où ces mots seront escrits ;
Pax hominibus bonæ voluntatis, sur le fronton du portique seront
assises deux Renommées tenantes vne trompette d’vne
main, & de l’autre vn Rameau d’oliue, quelques peuples à
genoux sur les costes de la corniche leurs baiseront les pieds

-- 5 --

auec cette deuise, qui tesmoignera leur rauissement ; Quam
prætiosi sunt pedes Euangelizantium Pacem.

 

Paix aux
hõmes de
bonne volonté.

En quelques endroits seront peints dans des ouales les
pourtraits de Messieurs les Deputez qui ont conclu la Paix
auec leurs Majestez.

La fausse porte du Faux-bourg Saint Honoré sera reuestuë
d’vne magnifique Arcade d’ordre Ionique, dont la corniche
sera supportée par quatre colomnes de part & d’autre
entre les deux des coins seront deux niches dans la droitte
desquelles sera la Concorde, & dans l’autre la Felicité. Quatre
attiques ou pilastres éleueront vn petit ordre au dessus du
premier, entre lesquelles dans le milieu vn tableau representera
le Roy & les quatre Estats à ses pieds, comme supplians.
L’on remarquera dans les esloignemens quelques batailles,
dont le funeste aspect imprimera quelque sorte d’horreur,
expliquée par cette deuise ; Nulla salus bello Pacem te poscimus
omnes.

Il n’y a
point de
salut à la
guerre,
nous vous
demandõs tous
la paix.

La porte de Sainct Honoré, sera la façade d’vn superbe
Palais, au dessus du premier ordre l’on verra dans vn quadre
vn tableau dans le milieu duquel sa Majesté sera representée
à l’vn de ses costez la Paix separera deux armées prestes à
se choquer, l’Abondance de l’autre introduira quantité de
biens & de viures par vne porte fortifiée de grosses tours, qui
representera celle de Paris : Vn Dieu paroistra dans le Ciel
benissant la personne du Roy, auec ces paroles. Fiat pax in
virtute tua, & abundantia in turribus tuis.

Que la
paix soit
en vos
puissances
&
l’abondance
dãs vos
[1 mot ill.].

Le Palais Royal estant desia reuestu d’assez riches ornemens,
son portail sera seulement paré de quelques festons
de feuilles & de fleurs soustenus par de petits Anges de relief,
qui supporteront pareillement vn tableau, auquel le
Roy sera depeint donnant audience à tous les Ambassadeurs
de l’Europe, & leur monstrera cette deuise du bout de
sont Sceptre au dessus d’vne ville de Paris. Rogate quæ ad pacem
sunt Ierusalem Il y aura sous le porche vn concert de
voix & d’instrumens.

Demandez
tout
ce qui
cõcerne
la paix
de Ierusalem,
c’est à
dire de
Paris,

A la Croix du Tirroir sera construit vn Arc de triomphe
de l’Ordre Corinthe, auec tous les ornemens immaginables

-- 6 --

sur le Portique duquel l’Innocence & la Raison exprimées
par des figures de relief, supporteront de leurs testes la corniche
du fronton, & d’vne main tiendront la bordure d’vn
tableau representant les felicitez de l’aage d’or accompagné
de cette deuise, Munera aurea pacis.

 

Les presens
dorez
de la
Paix.

A l’entrée du Pont-neuf, il y aura parreillement vn Arc
triomphal de l’ordre Composite. Aux deux costez de la
porte entre deux colomnes sur vn pied d’estail deux statuës
de femmes inclinées comme pour receuoir la Paix, representeront
la Ville de Paris, & la riuiere de Seine, & dans le
milieu au dessus de la corniche, aussi sur vn pied d’estail vne
figure de la France dans la mesme action que les autres.
L’on pourra lire sur la frize cette deuise.

Expectata venis.

Vous
venez à
la böne
heure.

Au droit de la ruë Neufue saint Anne, qui va rendre à l’vne
des portes du Palais, vn Arc ionique fera comme le portique
du Temple de la Iustice : Deux figures dans les niches
qui seront à costé de l’ouuerture representeront la Recompense
& le Supplice, & dans le tableau d’en haut supporté
par la Loy & la Raison, la Iustice & la Paix se tiendrõt estroitement
embrassées du costé droit, desquelles l’on verra leurs
Majestez accompagnées des Princes de leur Cour, & de
l’autre Nosseigneurs de la Cour de Parlement, comme rauis
de voir ces deux Nymphes en si bonne intelligence, la
deuise en sera telle, Iustitia & Pax osculabuntur.

La Iustice
& la
Paix se
baiserõt
encore.

A l’entrée de la ruë Neufue nostre-Dame, sera le dernier
& le plus beau de tous les Arcs de triomphe, en façon de
dessein d’Autel, ou l’ordre Dorique supportera le Corinthe,
la corniche auançant au droit du portique, & soustenuë par
de petits Cherubins en maniere de consoles, fera la table
de ce riche Autel, sur lequel seront des trophées d’armes
pesle-mesle, & sur des pieds destaux qui seront aux costez
entre les colomnes la Paix, foulant aux pieds la figure de
Mars, & tenant vn rameau d’oliue d’vne main, & de l’autre
vne torche ardante bruslera les armes, qui seront sur le
susdit Autel ; la Religion sera de l’autre costé, escrasant l’impieté
sous vne Croix qu’elle tiendra d’vne main, l’autre auec

-- 7 --

vn Encensoir flamboyant allumera pareillement les armes
posées sur l’Autel, pour les sacrifier à la figure de la saincte
Vierge, qui sera esleuée au feste du fronton, seruant d’amortissement
au second ordre : Elle aura sous ses pieds l’ancien
serpent, & respandra des branches d’oliuier & des lis de ses
mains diuines & liberales, dans l’espace ordinaire du tableau
l’on en verra quantité de petits, qui sont des vœux de
beaucoup de particuliers, presentez à cette Reyne du Ciel,
pour en obtenir la paix par ses puissantes intercessions, la
premiere frise portera ces mots en grosse lettre.

 

Consacrée
à la
Reyne
de Paix.

Reginæ pacis sacrum.

Le Char de triomphe dans lequel leurs Maiestez seront conduites
de saint Germain à Paris, sera de cette construction.
Les quatre rouës seront des Soleils enuironnez de rayons
d’or, & enrichis de quelques pierres precieuses, le corps ou
le vaisseau dudit chariot sera fait en forme de lampe antique,
gaudronée iusques à certain filet, qui regnera tout autour
au dessus duquel sera vne dance de petits enfans, pour la
resiouyssance de la paix en forme de frise qui soustiendra le
balustre, le derriere beaucoup plus esleué que le reste, fera le
throsne de la paix, ou sa figure sera posée vestuë d’vne chemise
desliée, & d’vn manteau de satin bleu sur l’espaule à la negligence,
elle tiendra d’vn costé la branche d’oliue symbole
de la paix, & de l’autre vne corne d’abondance, & sous les
pieds la discorde estouffée par les efforts de cette puissante
Déesse : Le siege de leurs Maiestez sera tant soit peu plus bas,
au dessus desquelles vn dais embroderie sera soustenu par des
termes de relief, il n’y aura point de cocher, dautant que les
six cheuaux blancs bardez, enharnachez & caparassonez de
broderie, seront menez en main par autant de Pages couronnez
de branche d’oliues, & reuestus d’habits sortables à cette
ceremonie, les particularitez de laquelle ie laisse à la disposition
du grand Maistre qui la doit ordonner.

Ce Char triomphal ayant passé par dessous tous les Arcs &
portiques susdits, s’arrestera deuant le Paruis de nostre-Dame,
où leurs Maiestez mettront pied à terre, pour entrer dans
le Chœur de l’Eglise, dans lequel elle seront introduites auec

-- 8 --

toute la Cour, par Monsieur le Coadjuteur qui fera chanter
ensuitte le Te Deum laudamus, en action de grace de cette
paix si miraculeusement obtenuë, Dieu veüille qu’elle soit
d’aussi longue durée que nous la souhaittons à la prosperité
de leurs Maiestez, & de nos incorruptibles Senateurs, par le
moyen desquels elle nous est euidemment procurée.

 

FIN.