A LA REYNE.

Sonnet.

 

Anne, dont les bontez seruent d’exẽple aux Dieux ;
Et dont tous les humains redoutent la puissance,
Auez-vous donc iuré de ruiner des lieux
Dignes de vostre Amour & de vostre Naissance.

 

 

De cent Trosnes diuers dont la faueur des Cieux
A vostre Auguste Fils offre la iouïssance,
Faut-il que celuy seul ou regnoient vos Ayeuls,
Tombe, pour se soûmettre à son obeïssance.

 

 

Si l’exemple fameux des plus grands Conquerants
Veut qu’il verse de sang cent furieux torrents
N’en peut-il point ailleurs inonder la campagne ?

 

 

Dedans le sang des Turcs noyer leur Potentat,
Et laisser viure en Soeurs, la France auec l’Espagne,
Comme si sous deux Roys ce n’estoit qu’vn Estat ?

 

-- 10 --