Anonyme [1651], LES PARTICVLARITEZ DES CEREMONIES OBSERVÉES EN LA Majorité du Roy. Auec ce qui s’est fait & passé au Parlement, le Roy seant en son Lict de Iustice. , françaisRéférence RIM : M0_2714. Cote locale : B_1_3.
Section précédent(e)

LES
PARTICVLARITEZ
DES CEREMONIES
OBSERVÉES EN LA
Majorité du Roy.

Auec ce qui s’est fait & passé au Parlement,
le Roy seant en son Lict de Iustice.

A PARIS,

M. DC. LI.

-- 2 --

-- 3 --

LES PARTICVLARITEZ
obseruées en la Majorité du Roy.

VN Ancien Autheur rapporte que l’Empereur
Constance, apres auoir fait son
entrée solennelle dans la ville de Rome,
& auoir magnifiquement consideré ses superbes
Palais, ses Temples, ses Emphitheatres,
& tout ce qui s’y voyoit de plus remarquables,
fut saisi d’vn tel rauissement, qu’il ne pût
s’empescher de se plaindre de la Renommée,
dautant que sa coustume estant d’exagerer
toutes choses, & de les porter beaucoup au de
là de leur juste grandeur, elle s’estoit monstrée
à l’endroit de Rome, ou foible, ne pouuant exprimer
par la force de ses paroles les merueilles
& les beautez qu’elle enfermoit, ou malicieuse
en les rabaissant à dessein, afin d’obscurcir
l’éclat de sa gloire. Certes, la crainte que tout
Paris ne formast contre moy la mesme plainte,
que ce grand Empereur fit contre la Renommée,
m’empescheroit de parler de la magnificence
qui le tient encor dedans l’estonnement,

-- 4 --

si ie ne m’y sentois forcé par le desir de faire
part à toute la France de la joye, dont nous
auons esté comblez, & de l’instruire de l’ordre
tenu dans cette belle pompe, dont voicy le recit.

 

Le Ieudy septiéme de Septembre ayant esté
choisi par sa Majesté, pour aller au Palais y tenir
son lict de Iustice, & entrer en majorité.
Les Regimens des Gardes Françoises & Suisses
furent commandées dés les quatre heures du
matin pour la garde des portes du Palais, & des
auenuës, depuis le Palais Cardinal ; Sçauoir,
le long de la ruë Sainct Honoré, de la Ferronnerie,
de Sainct Denys, depuis les Saincts Innocens
jusques à la porte de Paris, de Sainct
Iacques de la Boucherie, du pont Nostre Dame,
du Marché-neuf, de la ruë Neufue Sainct
Louis, & de Saincte Anne, qui estoit le chemin
que deuoit tenir sa Majesté, les Boutiques,
chambres, & toits qui sont dans cét espace, furent
remplis d’vn si grãd nombre d’échafauts,
& de peuple, que depuis les quatre heures du
matin iusques à vnze tout Paris sembloit estre
contenu dans quelques-vnes de ses ruës, si
bien que l’on pouuoit dire alors que la meilleure
partie de cette grande & populeuse ville
estoit comme deserte.

-- 5 --

Sur les neuf heures & demie, commença la
marche du Cortege de sa Majesté ; sçauoir,
d’vn grand nombre de caualiers, se suiuans à
la file, & se rengeans dans la court du Palais.

Apres eux marchoit la Compagnie des Cheuaux-legers
de la Reine, conduite par le Marquis
de Sainct Maigrin, paroissant auec sa grace
ordinaire, augmentée par la beauté de son équipage.
Cette compagnie, leste à merveille,
estoit suiuie de celle de sa Majesté, qui ne luy
cedoit en rien.

Le grand Preuost de l’Hostel superbement
vestu, & monté sur vn cheval barbe couuert
d’vne housse de brocatel, alloit apres à la
teste de la Compagnie de ses Gardes.

En suite marchoient les cent Suisses de la
garde du Roy, conduits par vn de leurs Officiers,
aussi vestu à l’auantage, son cheual caparassonné,
& couuert d’vne housse de satin
incarnat, garnie d’vne broderie & dentelle
d’or.

Apres les cent Suisses marchoit vn grand
nombre de Seigneurs, que l’on appelle la Noblesse
dorée dans l’équipage le plus pompeux
qu’il se puisse imaginer, tel ayant au seul harnois

-- 6 --

de son cheual pour quatre mille escus de
broderie.

 

Apres cette Noblesse, qui sembloit emporter
sur ses habits toute la dépoüille des Indes,
& du Perou, Marchoient à pied les gardes
du Corps de sa Majesté, qui estoient suiuis
de six Herauts d’armes, reuestus de leurs cottes
de velours violet, parsemées de Fleurs de lys
d’or.

Marchoient en suite les Mareschaux de
France, qui ne cedoient en rien aux premiers,
tant en la richesse de leurs habits, qu’en la
beauté & parure de leurs cheuaux.

Entre les Mareschaux de France & les Valets
de pied de sa Majesté, paroissoit le Comte
de Harcour seul à cheual, tenant en main l’épée
de grand Escuyer.

Apres vne troupe de Valets de pied,
paroissoit le Roy à cheual, auec vne grace &
vne Majesté, qui tiroient des larmes de joye des
yeux de tous les Spectateurs, & des cris de Viue
le Roy, de toutes les bouches.

Autour de sa Majesté marchoient les Princes,
Ducs & Pairs de France.

Venoient apres les Gardes de la Reine, qui

-- 7 --

parut dans son carrosse, dans lequel estoient
Monsieur le Duc d’Anjou en vne portiere, &
Monseigneur le Duc d’Orleans à l’autre.

 

Derriere le carrosse estoient les Officiers
de la Reyne, & en suite d’iceux, les Compagnies
des Gens d’armes de leurs Majestez.

Auec ce beau Cortege, le Roy alla descendre
au bas des degrez de la Saincte Chappelle,
où il monta, pour entendre la Messe, ayant esté
auparauant receu par Messieurs du Parlement.

La Messe acheuée, Sa Majesté alla se soir en
son Lict de Iustice, où apres les ceremonies accoustumées,
& les remerciemens faits à la Reine
sa Mere, le Roy commanda, que les Declarations
cy-deuant faites en faueur de Monsieur le
Prince de Condé, fussent leuës, & couchées sur
les registres de la Cour. Et ainsi ce grand Prince
a commancé à nous donner des preuues de sa
Iustice & prudence, & des arres asseurés du
bon heur dont toute la France doit jouir tant
qu’elle sera soûmise à la conduite d’vn si sage
Monarque.

Sur les douze heures & demie, toutes les ceremonies
estant acheuées, Sa Majesté s’en retourna
au Palais Royal dans le carrosse se la

-- 8 --

Reine, dans lequel estoient Monsieur le Due
d’Anjou Frere vnique du Roy, & Son Altesse
Royale, auec la mesme suite qui l’auoit accompagné.
Et ce fut alors que l’on entendit le tonnerre
des boettes & canons tirez de la Greve, de
l’Arsenal & de la Bastille, qui firent deuoir d’imiter
par leurs bouches enflammées les cris
d’allegresses que le peuple poussoit dans l’air en
réjouissance d’vne action si celebre & desirée
depuis si long temps.

 

FIN.

Section précédent(e)


Anonyme [1651], LES PARTICVLARITEZ DES CEREMONIES OBSERVÉES EN LA Majorité du Roy. Auec ce qui s’est fait & passé au Parlement, le Roy seant en son Lict de Iustice. , françaisRéférence RIM : M0_2714. Cote locale : B_1_3.