Statuts des Cheualiers de la Paille.

 

Tous les Cheualiers de la Paille
Estans receus sont auertis
D’exterminer cette canaille
De Mazarins grands & petits.

 

 

De croire que son Eminence
Est le veritable Ante-christ,
Que c’est vertu, non pas offense,
D’auoir la teste du proscript.

 

 

Contre luy d’vn Arrest fort iuste
Demander l’execution,
Sur qui nostre Monarque Auguste
A fait sa Declaration.

 

 

Abjurer le Mazarinisme
Qui s’est dans la Cour introduit,
Comme vne erreur, ou comme vn schisme,
Qui beaucoup d’esprits a seduit.

 

 

Que le Coadjuteur qui lorgne
Pour estre Ministre d’Estat,
Aussi bien que Seruien le borgne

-- 21 --

Est de la Fronde vn apostat.

 

 

Et que son Altesse Royale
N’a point d’autre but que la Paix,
Et que le Cardinal d’estalle
Hors de la France pour iamais.

 

 

Crians, viue le Roy de France,
Viue les Princes de Bourbon,
Point de Iule, point d’Eminence,
Iamais Cardinal ny fut bon.

 

 

Quand ils seront à la tauerne,
Ils boiront tous à la santé
Du Prince, & que le Diable berne
Iules & sa posterité.

 

Le bon Conseiller m’ayant fait lecture de ses
vers, ie les estimé par complaisance, & ne voulus
pas les contredire, de crainte qu’il ne me
donnast pour disner que ce mets, dont ie n’auois
pas grand besoin, estant affamé comme
vn chasseur, mais ayant remply mon ventre de
viande plus solide, & ayant beu la santé des
Princes, ie commençay à dire mon sentiment,
& tiré de ma pochette quelques vers, qui seruoient
de response pour le papier des Mazarins,
à la paille des Frondeurs : ils estoient ainsi, si
bien il me souuient.

-- 22 --