Diuerses sortes de Vers, sur le Pape des
Maltotiers.

 

Tout est sousmis à sa puissance,
Et si sa Majesté vouloit,
Pas vn Officier de France,
Ne porteroit glans au collet.
Grand Fourbe ! est-il bien croyable
Que vous vueillez, ambitieux,
Passer pour vn Sainct dans ces lieux
Où chacun vous tient pour vn Diable.

 

 

L’enleuement de nos deniers,
L’oppression des Officiers,
Le Peuple mis à l’indigence,
Et tant de maux dont on se plaint,
Que seul vous causez à la France,
Sont-ce les ouurages d’vn Sainct ?

 

AVTRE.

 

On dit (peut-estre dit-on mal)
Que la grande Armée de Flandre
Ne prend rien ; mais ne fait ue rendre,
Au contraire du Cardinal
Qui prend tout, & ne veut rien rendre.

 

AVTRE.

 

Si l’on faisoit comparaison
Du grand Armand, au seigneur Iule,
Elle seroit plus ridicule
Que d’vn Aigle à vn Oyson.

 

AVTRE.

 

L’Autre jour deux Faquins portoint dans vne chaise,
Vn qui ne va jamais qu’auec le pare-sol,
Rencontrerent vn Boucher, qui portoit sur son col
Deux Veaux entrelassez, en guise d’vne fraise ;
Gare, luy dirent-ils, d’vn ton graue & mutin.
Le Boucher assisté de son puissant mâtin,
Dit : Ie n’en feray rien, & i’auray le passage.
N’auoit-il pas raison ? selon le sens commun,
Car vn en portoit deux, & deux n’en portoient qu’vn.

 

-- 5 --

SVR LES ESCVRIES DV SICILIEN.

 

Orgueilleux bastimens où l’injuste abondance,
Monstre au Peuple l’horreur de sa necessité,
Censeurs, qui sans parler reprochent à la France,
Ou son peu de courage, ou sa stupidité :
Ie ne puis contempler vostre magnificence
Que d’vn esprit boüillant & d’vn œil courroucé,
Voyant que les Cheuaux sont traitez d’Eminence,
Et qu’on les void loger en cette qualité.
Non, ie ne vous puis voir éclatante Escurie,
Que d’vn libre discours, soudain ie ne m’écrie :
O trop sensible abus d’vne Minorité !
L’on peut voir aisément, dans le siecle où nous sommes,
Tout ce que des Tyrans a dit l’Antiquité,
Puis qu’encore aux Cheuaux on fait manger les Hommes.

 

ANAGRAMME LATINE SEANT AV
PERSONNAGE.

Iulius Masarinus. VILIS ASINVS RVAM.

DISTIQVE DE LA REYNE, DE M. LE PRINCE,
ET DV SICILIEN.

Tres ludunt Regina parens, Condæus, Iulius.

Hic rapit, hæc præbet, hoc Mazarinus haber.

SVR LES ARMES DV SICILIEN.

 

Quid fasces ? tristemque geris Romane securim
Littor, & in nostros dirigis arma sinus,
Desine fatali Gallos terrere rüina.
In propriam recident tela retorta necem
Arma tuum hæc caputabscindent, & versa Ministris
Fascibus in cineres corpora ventus aget.

 

SVR LE BON HOMME D’EMERY.

 

Pour guerir d’Emery de ce vomissement,
Qui fait tant discourir Messieurs du Parlement,
Il croit qu’il suffira viste changer de giste,
Tout grand esprit qu’il ait, il peche lourdement,
Vn Arrest de la Cour chemine encor’plus viste.
Le bon Sicilien luy dit à son depart,
Pour vous guerir, Cousin, ie crains qu’il soit trop tard,
Vous estes oppressé de quantité de graise,
Songez que ceux qui sont ainsi chargez de lard,
Sont fort incommodez au milieu de la presse.

 

-- 6 --

 

Vostre mal comme on sçait vient de repletion,
Moy, ie m’en sens vn peu ; mais cette oppression
Ne m’empeschera point d’acheuer ma campagne,
I’ay d’vn ORVIETAN, dont la confection
Me peut rendre aussi sain en France qu’en Espagne.

 

 

Ie me sçay bien purger, quand ie me sens trop plain,
Et sçay le vray secret pour estre tousiours sain,
De n’engendrer iamais bile, ou meslancholie,
Mes superfluitez du iour au lendemain,
Lorsque ie suis pressé, passent en Italie :

 

 

Mais vous dont les humeurs sont encore au dedans,
Craignez ces maux soudains qui font grincer les dens,
La Chambre de Iustice est desormais complaitte,
On vous va tondre net, & tous les Intendans
Desirent de vous voir bien-tost sur la selette.

 

 

A ces mots on le vit enrager de despit,
N’eust esté qu’il craignoit de gaster son habit,
Il fust creué cens fois aux pieds de l’Eminence :
I’en sortiray pourtant, dit-il, sans contredit,
Ie tiens en mon pouuoir tous les Iustes de France.

 

AVTRE SVR LE MESME.

 

ON maudit le Destin, Monsieur le Controlleur,
Qui vous a tousiours fait le mignon du bon-heur,
Que le Roy vous ait fait, ou bien son Eminence
Son superbe Intendant, malgré toute la France,
Et que sçachant en vous tant de subtilité,
Ils ayent eu pour vous tant de fidelité.
Vous sçauez les moiens de prolonger la Guerre,
Puisqu’en despit de nous, du Ciel, & de la Terre,
Vous trouuez de l’argent où il n’en fut iamais,
Ce qui vous rend meschant ennemy de la Pais ;
Maintenant le destin defend qu’on vous appelle
De ce haut rang d’honneur du nom de Particelle :
Mais ce grand d’Emery à double carrillon
Aupres duquel Tubœuf n’est qu’vn Emerillon,
Et ces pauures petits Regrattiers des Finances,
Sont autant de morceaux pour remplir vostre pance ;
Puisqu’aussi bien ventru comme vn loup deuorant
Vous vous este saoulé du sang du Païsant :
Et laissant maintenant cette viande grossiere,
Celle-cy vous auez gardé pour la derniere,
Pour en faire à vostre aise vn plus friant repas,

-- 7 --

Mais prenez garde aussi de n’en estrangler pas.
Peut estre dira-on que i’ay peu de ceruelle,
De traitter d’Emery ainsi qu’vn Particelle,
Qui iadis pour vn tour trop subtil & nouueau,
Eschappa par deux fois de la main du Bourreau ;
Et qui pour épargner vne toise de corde
A ce pauure Coquin, on fit misericorde :
Mais il n’eut pas plustost eschappé ce mal-heur,
Que de petit Larron, il deuint grand Voleur :
Car voyant tout d’vn coup que la Fortune fiere,
Dont il n’auoit encor’baisé que le derriere,
Se presentoit à luy d’vn visage riant,
En luy mettant en main la charge d’Intendant ;
Il joignit à sa trongne vn seuere visage,
Il fit publiquement des leçons de pillage,
Faisant souffrir sans cesse à ces pauures Pallots,
Pour tirer leur argent, prisons, fers & cachots ;
Faisant emprisonner en vn iour plus de mille,
Pillant cruellement la Vefue & le Pupille,
Arrachant de la main de l’Enfant affamé,
Le pain, qu’à peine encor’il auoit entamé.
Des plus aisez Bourgeois raflant iusques à la maille,
Reduisant les plus riches à coucher sur la paille ;
Et pour recompenser se voleur impudent
On le fait Controlleur & puis Sur-Intendance :
Ainsi le Sort se plaist du pied d’vne Potence,
Des leuer vn Coquin à la Sur-Intendance :
Si le Sort luy a fait des biens sans limiter,
On verra qu’il la fait pour le Precipiter ;
Car lors que tant d’honneur la fortune presente,
Et qu’elle veut faire voir sa vertu inconstante,
Elle l’esleue si haut le Sot ambitieux,
Que s’oubliant soy-mesme pour est trop heureux,
Il tombe sur les fers, & dessus l’eschaffau
Où il finit ses iours par la main d’vn bourreau.
Voy donc comme de toy elle se mocque & ioüe,
Puisque t’ayant monté a plus haut de la roüe,
Elle a trouué soudain par vn traict tout nouueau
Le moien de te mettre bien-tost dans le tombeau,
Paris, apres ta mort, pour te seruir de biere,
Te presente desia vne vieille ciuiere,
Pour rainer ta charongne au fameux Montfaucon
Où tu seras haché ainsi qu’vn autre Eson.
Le peuple furieux pour assouuir sa rage

-- 8 --

Fera de ton cadavre vn horrible carnage,
Et afin d’angraisser les choux d’Auberuillier
Semera tes boyaux pour seruir de fumier.
Desia pour cette fin toute la Populasse,
A qui tu n’as laissé que l’ombre & la carcasse,
Iette ses larmes & ses prieres aux Cieux,
Pour attirer sur toy, la vengeance des Dieux.
Qui doute qu’elle n’ait vn effet salutaire,
Puisque ton chastiment en augmente la gloire ?

 

Rondeau de Particelle dit d’Emery.

 

QV’IL fût Party de la Sur-Intendance,
Sans ce fascher, ce n’est pas la creance
Ny de la Cour, ny des autres Quartiers :
Mais qu’il le fût des membres tous entiers
C’est le souhait de toute nostre France :
Peuple, Officiers, chacun pert patience,
L’vn veut la Roüe, l’autre veut la Potence,
L’autre voudroit qu’en cent mille quartiers. Il fut party.
A dire vray, voyant son insolence,
Et la façon qu’il traittoit la Finance,
Tout le Palaïs rabattroit volontiers
Son arrogance, & ses esprits altiers
En ce procez, qu’il n’auroit esperance. Qu’il fut party.

 

Sur les Barricades.

 

AMIS, pendant les Barricades
Où l’on entend les mousquetades,
Beuuons icy tous à la fois,
Et regardons auec le verre
Qui emportera la Victoire
Des Gens-d’armes, ou des Bourgeois.

 

 

L’on n’entent que clyquetis d’armes
Par tout on crie : Aux armes, aux armes :
Mais m’ocquons nous de leurs debats,
Ne songeons qu’à prendre le verre
Et laissons leur faire la guerre
Tandis que nous vuidons les plats.

 

FIN.