ODE PANEGYRIQVE DES
rares Vertus de Monseigneur l’Archeuesque
de Corinthe, Coadjuteur de Paris.

 

VOVS dont toutes les actions
Valent des predications,
Merueille de l’Eglise, ornement
de la France,
Prelat docte, & Religieux
Qui par vne viue esperance
Habitez desia dans les Cieux,
Vous ne verrez point dans cett’Ode
Où i’entreprens de vous loüer
Vne complaisance à la mode
Et vous n’aurez pas droit de m’y desaduoüer

 

 

Ne sçachant par où commencer
I’aime bien mieux m’embarasser
Que de suiure pour vous la coustume ordinaire
Mesme des plus fameux Autheurs,
Et n’estant pas d’humeur à faire

-- 4 --

Ce que font les Imitateurs
Ie laisse le soin à l’Histoire
De parler de vos grands Ayeux
A qui vous donnez plus de gloire
Que vous n’en receuez, quoy qu’ils soient
Demy-Dieux.

 

 

Tout le monde sçait en quel rang
Vous doit faire tenir le sang
Des plus braues Heros qu’ait produit l’Italie ;
Et la France auecques raison
Confesse qu’elle est embellie
Par l’esclat de vostre Maison :
Mais les graces surnaturelles
Dont le Ciel vous voulut combler
Arrestent ma plume sur elles
Encore que ma main ait sujet de trembler.

 

 

Certes, admirable GONDY,
Vn mortel seroit bien hardy
S’il croyoit par ses vers egaler vos loüanges,
Car pour en parler dignement
Il faudroit ressembler aux Anges
Dont vous auez l’entendement,
Ou bien il faudroit que vous mesme
Renonçant à l’humilité

-- 5 --

D’vne Oraison ou d’vn Poëme
Fissiez vostre tableau pour l’immortalité.

 

 

Cette illustre societé
Que Paris & l’antiquité
A toutes nations rendent si venerable
La Sorbonne a veu sur ses bancs
Que vous estiez incomparable
Mesme dés vos plus ieunes ans ;
Surprise de tant de miracles
Sur vous elle jetta les yeux
Comme sur vn de ses oracles,
Et vous fit de son corps vn membre precieux.

 

 

Des plus contraires qualitez
Vous joignez les extremitez :
Vous auez de l’esprit sans mãquer de memoire,
Vous estes plein de iugement,
Et ce qu’ailleurs on ne peut croire
En vous on le voit clairement :
Vous sçauez enseigner & plaire,
Et d’vn million d’auditeurs
Alors que vous estes en chaire
Vous en faites tousiours autant d’admirateurs.

 

-- 6 --

 

Combien par vos doctes sermons,
Malgré la rage des Demons
A t’on veu, bon Pasteur, de brebis egarées
Dans le sainct troupeau se ranger
Et par des routes asseurées
Des loups euiter le danger ?
Aux charmes de vostre eloquence
Le plus difficile se rend
Et vostre profonde science
Deliure de l’erreur l’ame qui la comprend.

 

 

Mais si par vos discours instruit
Tout le peuple a fait tant de fruit
Ha ! que par vostre exemple il en fait dauãtage,
Quand vous exposez à ses yeux
Vn homme en la fleur de son âge
Qui vit comme s’il estoit vieux,
Qui dans l’aise, & dans l’abondance
Se deffend de la volupté
Et d’vne sainte violence
Fait sur ses appetits regner sa volonté.

 

-- 7 --

 

Si Paris est respectueux
Pour vn homme si vertueux ;
Pour vn si bon Prelat son amour est extréme ;
Pour vn si bon Predicateur
Son estonnement est le mesme
Qu’il est pour vn si grand Docteur ;
Enfin vous contraignez l’enuie
De ceder à la verité
Et d’admirer en vostre vie
La force de l’esprit, & la simplicité.

 

 

Ainsi, beau miroir des Prelats,
Puis que vous deuancez les pas
De ces grands Cardinaux sortis de vostre race,
Rome vous doit conter vn iour
Plus par iustice que par grace
Entre les Princes de sa Cour :
Oüy, si le Conclaue estoit libre
Pour le reste des nations ;
Ou que la Seine fut le Tybre
Les clefs seroient le prix de vos perfections

 

DV-TEIL.

FIN.

-- 8 --