HARANGVE DE MONSIEVR
le Preuost des Marchands faicte au Roy.

SIRE,

Vostre bonne Ville de Paris veut tesmoigner
à vostre Majesté la grande joye qu’elle
a de son heureux retour en icelle, elle la
considere cõme son Soleil, dont la presence
dissippera tous les nuages obscurs & tenebreux,
d’ennuy & de tristesse qu’elle a souffert
pendant son absence, elle se promet
aujour-d’huy jouïr des iours d’Alcyon
exempts d’orages, de tempestes & de tourbillons :
celuy est vne Iris Thaumantide,
qui luy donne asseurance d’vne bonne Paix,
dans laquelle elle reprendra son ancienne
splendeur, & reuerra la prosperité en ses familles,
& nonobstant toute la mauuaise saison
qu’elle a euë durant quelques années, cela
n’a rien diminué de l’estimation naturelle
qu’elle à d’aymer son Roy, ainsi qu’elle a fait

-- 8 --

entendre à vostre Maiesté par les Deputez
des six Corps des Marchands, par la bouche
de ses Colonels & par la nostre, sans se départir
iamais du seruice, & de l’obeïssance
qu’elle a tousiours euë singuliere, protestans
de vouloir viure & mourir auec cette gloire
d’estre tres-fidelles à Vostre Maiesté, de laquelle

 

SIRE,
Ils veullent estre creus.

Tres-humbles, & tres-obeïssans
seruiteurs & Subjets.